sábado, 7 de noviembre de 2026
Nota informativa elaborada por Galicia Digital:
A plataforma en Internet GaliciaDigital ten solicitada a dedicación do Día das Letras Galegas 2014 para o escritor de Paradela Manuel Rodríguez López. Fíxolle chegar esta petición ao Presidente da Real Academia Galega, Xesús Alonso Montero, e a través da Secretaría desta Institución a todos os académicos. O Presidente da R.A.G. confirmou que presentará esta solicitude á Academia no momento oportuno, xunto con todas as demais recibidas ao efecto.
En 2014 cúmprense oitenta anos do nacemento do escritor en Paradela e en 2015 os vintecinco do seu pasamento. Por iso se efectúa agora esta petición, tendo en conta a intención da R.A.G. de ser máis rigorosa na elección do persoeiro a quen se lle dedica a maior celebración relacionada coas nosas letras, tendo en conta a vida e obra deste poeta obreiro, considerado un dos mellores deste xénero da Galicia do século XX.
GaliciaDigital ten emprendida unha campaña de difusión da vida e obra de Manuel Rodríguez López (emigrante galego, "Galego en Catalunya"), en colaboración coa familia do escritor, o Concello de Paradela, a Secretaría Xeral de Política Lingüística da Xunta de Galicia, a Vicepresidencia Primeira da Deputación Provincial de Lugo e o Concello de Lugo, que se iniciou en 2012 coa creación da web www.manuelrodriguezlopez.org, nos idiomas castelán, galego, inglés e catalán, e que terá continuación neste ano cunha exposición itinerante sobre este autor.
Máis información: www.manuelrodriguezlopez.org
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
