domingo, 8 de noviembre de 2026
Nota de prensa remitida por la Xunta de Galicia:
A Consellaría do Medio Rural convocou aos veciños dos concellos das comarcas dos Ancares-Courel a asistir a unha sesión de cinema ao aire libre este luns, ás dez da noite, no Mosteiro de Samos para dar a coñecer as posibilidades da nova tecnoloxía Wimax de acceso a internet que se está a implantar, de forma experimental, nos concellos de Samos e de Folgoso do Courel e que se prevé ampliar a outras zonas rurais de Galiza.
A piques de concluír as obras de instalación da nova rede, o departamento de Estruturas e Infraestruturas Agrarias da Delegación provincial de Lugo pretende coñecer cales son as necesidades máis importantes dos veciños da zona e como se poden subsanar a través do acceso a internet.
Para iso distribuirá unha sinxela enquisa entre os asistentes e, nos vindeiros días, proseguirá coas consultas entre os fogares e as empresas da zona.
Así mesmo, antes da proxección, a técnica de dinamización contratada dentro do Plan de desenvolvemento Ancares-Courel, explicará as posibilidades desta infraestrutura que, entre outras cousas, permite acceder a distintos paquetes de servizos mediante unha sinxela conexión que, durante o período que o plan piloto estea en marcha, será gratuíto.
Precisamente, co obxectivo de que os futuros usuarios se familiaricen coa súa utilización, a Consellaría organizará diversos cursos de formación sobre o manexo de ferramentas informáticas básicas, de teletraballo ou de comercio electrónico.
Dentro do plan deseñado por Medio Rural, tamén está prevista a posta en marcha dun proxecto piloto de detección remota de incendios e outro de vixilancia ambiental, a xeración de puntos de información e de conexión á rede ao longo do Camiño de Santiago, a súa aplicación nos centros educativos da zona como un recurso de aprendizaxe máis e a súa extensión entre as pemes, concellos e entidades privadas do LIC, co fin de que se incorporen ao negocio electrónico e adapten a súa xestión ao "modelo en rede".
Así mesmo, tamén se prevé a execución do Programa Asisto, un servizo asistencial remoto dirixido a persoas maiores e discapacitadas que permite a monitorización ou a consulta médica a distancia mediante distintas tecnoloxías de doado manexo para o usuario.
Nestes intres, a Consellaría traballa na elaboración dun portal electrónico que aglutine estes e outros servizos e que contribúa a mellorar a competitividade das explotacións agropecuarias e das empresas existentes na comarca.
Esta ferramenta está concibida para darlle solución ás necesidades específicas das granxas, casas de turismo rural, empresas de servizos e establecementos comerciais, entre outros, presentes na zona, para o que se facilitará a creación de webs sectoriais e o manexo de instrumentos adaptados ao perfil de cada usuario (SIXPAC, administración electrónica, control leiteiro, central de reservas hostaleiras...).
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
