viernes, 18 de septiembre de 2026
O Consello da Xunta analizou hoxe as próximas convocatorias de axudas dirixidas á transferencia de coñecemento e resultados de investigación, así como á colaboración estratéxica no ámbito da I+D+i, por parte da Consellería de Educación, Ciencia, Universidades e FP.
Ademais de debullar este mapa de liñas, na reunión semanal do Goberno autonómico deuse conta da primeira convocatoria que se publicará este mesmo mes: o programa Ignicia, cun investimento de 4 M para apoiar entre 8 e 10 proxectos de spin-offs e de tecnoloxía creada en Galicia.
Ao longo deste ano a Axencia Galega de Innovación contará cun paquete de axudas que suman un orzamento de 52 M e que están recollidas no Plan galego de investigación e innovación 2025-2027, dotado de 1.310 millóns de euros.
En concreto, a Consellería de Ciencia financiará a posta en marcha de novos proxectos empresariais que requiran o uso de tecnoloxía ou coñecementos desenvoltos a partir da actividade investigadora e nos cales a estratexia de negocio se basee no desenvolvemento tecnolóxico. Farao co programa Recuperación excelencia NEOTEC, previsto para rescatar proxectos presentados á liña estatal do Centro para o Desenvolvemento Tecnolóxico e a Innovación (CDTI) e que non acadaron financiamento por esa vía en 2023 e 2024.
Tamén se lanzará ao longo deste trimestre a nova convocatoria de Nexos, coa que, tal e como explicou o presidente, o Goberno galego fomenta a colaboración entre empresas e centros de coñecemento, xa sexan das universidades, centros tecnolóxicos ou outro tipo de entidade. A previsión é chegar a 200 beneficiarios, priorizando ámbitos temáticos que xeren solucións innovadoras tras o traballo en conxunto de diferentes entidades de investigación.
Entre outras medidas, tamén destaca a convocatoria das unidades mixtas de investigación, un instrumento para o desenvolvemento de proxectos público-privados a través de grupos mixtos de traballo entre organismos de investigación e o tecido empresarial. Estes grupos deben desenvolver proxectos de alto impacto para incentivar a transferencia de resultados das investigacións ao mercado e atraer empresas foráneas cara a Galicia que desenvolvan aquí a súa actividade.
A Xunta tamén impulsará Vinnovate, enmarcada na rede europea Vnaguard Initiative composta por 38 rexións, e que busca potenciar unha maior colaboración e presenza europea e internacional dos axentes da I+D+i galega mediante a realización de proxectos colaborativos interrexionais. No eido da internacionalización tamén está prevista unha liña para apoiar o fomento das sinerxías con fondos europeos dedicados á I+D+i.
No que atinxe aos centros tecnolóxicos, a programación inclúe axudas para fortalecer as súas capacidades con investimentos en infraestruturas e equipamento, así como outra liña para a consolidación e estruturación de unidades de investigación competitivas.
A primeira convocatoria en abril
A Axencia Galega de Innovación publicará ao longo deste mes de abril a primeira axuda deste paquete de 52 millóns de euros: o programa Ignicia. Esta medida, un dos principais instrumentos da Xunta de Galicia para facilitar a transferencia de coñecemento real das investigacións á sociedade, desenvólvese a través de dúas liñas de actuación complementarias: Ignicia Proba de Concepto, a que se lanzará neste mes, e Ignicia Transferencia, que desprega un conxunto de actuacións especializadas de apoio como programas de captación e transferencia e persoal investigador, seguimento de indicadores de transferencia ou o posicionamento do programa Ignicia nos eidos rexional, nacional e internacional.
Deste xeito, o Goberno galego convocará a quinta edición do programa Ignicia Proba de Concepto co obxectivo de potenciar a valorización do coñecemento dos centros de I+D+i galegos, impulsando a creación de novas spin-offs e acordos de licenzas de comercialización da tecnoloxía xerada en Galicia. A convocatoria irá destinada aos organismos de investigación galegos, desde as universidades públicas ata os centros tecnolóxicos, así como a centros do CSIC en Galicia ou fundacións sanitarias.
A través desta liña prevese a selección de entre oito e 10 proxectos -que se sumarán aos 32 xa apoiados en convocatorias previas- para comezar a executalos en xaneiro de 2026 durante un prazo estimado de dous anos. Ignicia, que serve como nexo entre a ciencia excelente e a contorna empresarial, pon o foco no proceso de selección e no seguimento próximo dos proxectos durante a súa execución, apoiando a ciencia excelente para facer rendible o investimento. Deste xeito, os proxectos deben contar con capacidade de xerar retornos económicos e ter como fin a comercialización dos resultados da investigación.
Con esta nova edición de Ignicia, a Xunta chegará a un investimento de 17M en proxectos de transferencia. Desde a primeira convocatoria, en 2016, apoiáronse 32 proxectos que xa deron lugar a 11 spin-offs e tres acordos coa industria, atopándose 15 proxectos en desenvolvemento comercial. En total, a través destes proxectos emprégase a máis de 150 profesionais de alta cualificación e lévanse captado máis de 27M de financiamento público e privado a nivel nacional e internacional.
Biotecnoloxía, intelixencia artificial e cuántica
A maiores, o Executivo galego está traballando en tres novas convocatorias de cara a 2026 como se anunciou no acto de presentación do Plan de investigación e innovación 2025-2027. Estas iniciativas, dotadas con máis de 10M, reforzarán a competitividade dos sectores estratéxicos galegos a través do financiamento de proxectos de I+D+i.
Centraranse en tres ámbitos prioritarios para Galicia: proxectos colaborativos no sector da biotecnoloxía, para reforzar as capacidades do sector; proxectos colaborativos de tecnoloxías profundas, dirixidos ao fomento da intelixencia artificial e a cuántica, e apoio a proxectos de investigación e desenvolvemento empresarial, para xerar solucións tecnolóxicas de alto impacto e o fomento do emprego altamente cualificado.
Medio milleiro de investigadoras e investigadores e máis de 150 actividades científicas nas sete cidades galegas: Vigo, Ourense, Pontevedra, Santiago, A Coruña, Ferrol e Lugo. Así se celebrará en Galicia a sexta edición da Noite Galega das Persoas Investigadoras, G-Night 2026, unha actividade na que a comunidade científica galega une talento e esforzos co obxectivo de achegar a ciencia á cidadanía e espertar vocacións científicas, ao tempo que se ofrecen propostas de lecer científico, cultural e educativo para toda a familia.
A Xunta de Galicia reclama ao Goberno central medidas estruturais de apoio ao sector agrogandeiro. Do mesmo xeito, esíxese que se teña en conta a realidade de cada territorio á hora de levar a cabo estas actuacións, que deben executarse de xeito urxente. Así o trasladou a conselleira do Medio Rural, María José Gómez, na Conferencia Sectorial celebrada en Madrid, na que se dirixiu ao ministro de Agricultura, Pesca e Alimentación, Luis Planas, para facer estas reclamacións. Alí, reafirmou tamén o compromiso do Executivo galego con este sector.
