lunes, 26 de octubre de 2026
Tras o Nadal, a Sala José Sellier da Coruña reabre mañá as súas portas para a primeira proxección do ano: Toni Erdman, de Maren Ade, primeiro dos catro títulos do especial Sandra Hüller: anatomía dunha actriz. Este foco inclúe tamén as dúas películas coas que a intérprete xermana irrompeu en 2023 no panorama internacional: Anatomía de una caída, de Justine Triet, que poderá verse os días 10 e 11, e La zona de interés, de Jonathan Glazer, os días 21 e 22. O cuarto filme do ciclo é El reflejo de Sibyl, tamén asinado por Justine Triet, con pases este mércores 8 e o xoves 9.
Xa a semana que vén, a Filmoteca de Galicia recibe a cineasta Elena López Riera como protagonista do mes no marco de Close-Up, que afonda na situación actual do cinema feito por mulleres. A realizadora valenciana estará na Coruña o martes 14 para participar nun encontro co público, previo á proxección do seu documental Las novias del sur, exhibido na Semana da Crítica de Cannes e candidato aos Goya na categoría de mellor curta documental. Ao día seguinte, a directora presentará unha nova sesión coas súas tres primeiras curtametraxes: Pueblo, Las vísceras e Los que desean.
Magellan, viaxe á Idade de Pedra do cine
O estadounidense Hollis Frampton é outro dos protagonistas de xaneiro, cun amplo achegamento ao seu ciclo Magellan. Baixo o comisariado de Francisco Algarín Navarro, A Idade de Pedra do cine ofrece entre o 16 e o 18 de xaneiro 26 destas películas en 16mm, cedidas pola Filmmakers Coop de Nova York, no que é o foco más amplo dos que se lle teñen dedicado en España e o primeiro que se celebra a nivel mundial en varias décadas.
Coincidindo coa súa mudanza a unha granxa de Eaton (Nova York), Frampton comezou en 1972 un ciclo monumental, no que traballou ata o seu pasamento en 1984. Referente do cine estrutural xunto a Michael Snow, George Landow, Ernie Gehr, Joyce Wieland ou Ken Jacobs, Frampton prolonga en Magellan as exploracións emprendidas nos seus dous proxectos anteriores.
Retrospectiva do tándem Fisher e Lee
Cara a finais de mes dará comezo outro dos novos ciclos da Filmoteca, Terence Fisher/Christopher Lee: Drácula e outros monstros, que reúne unha selección de producións dirixidas por Fisher con Lee como protagonista. O programa bota a andar con catro títulos: La maldición de Frankenstein (días 21 e 22), Drácula (días 23 e 24), La momia (días 29 e 30) e El perro de los Baskerville (día 31 e 4 de febreiro).
A través desta escolma, poderá apreciarse como o estilo de Fisher vai evolucionando desde o barroquismo de Frankenstein e do primeiro Drácula cara a unha posta en escena máis austera, á que vai desposuíndo de artificios. Este especial continuará en febreiro, mes no que tamén chegará á cinemateca galega unha completa retrospectiva sobre o cineasta catalán Pere Portabella, coa aparición do actor Christopher Lee en dous títulos, incluíndo unha nova interpretación do papel de Drácula.
Javier Rebollo en Fóra de serie
A Sala José Sellier recibe o martes 28 a visita de Javier Rebollo, quen conversará co público antes da proxección da súa última longametraxe, En la alcoba del sultán, dentro da sección Fóra de serie. Tamén no marco deste apartado, a cinemateca da Xunta de Galicia trae á Coruña filmes como Paradise is burning de Mika Gustafson (días 8 e 9), La hora de la estrella de Suzana Amaral (día 15), El último verano de Catherine Breillat (días 23 e 24) e, xa a finais de mes, con dobre sesión o 30 e 31 de xaneiro, John y el hoyo, película independente norteamericana dirixida polo ferrolán Pascual Sisto, presentada en Sundance 2021 e avalada polo festival de Cannes.
Ademais, en xaneiro continúa o ciclo gratuíto Materiais para una historia do cine en Galicia, coa proxección o día 10 de dúas fitas que nos levan á Coruña dos anos 20 do pasado século: Coruña, años 20 (1929), de Ángel Durán Villarnovo, e Galicia/Tranvías de La Coruña (1926), da Compañía de Tranvías. Tamén con entrada de balde, Filmoteca Jr. exhibirá o sábado 25 El chico, de Charles Chaplin, para público a partir dos 7 anos e idade, mentres que o día 29 se proxectará na sección Off Galicia o documental A caverna dos soños, de Víctor Barús, Javi SeGa e JERL, sobre a figura do pintor coruñés Correa Corredoira.
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
