sábado, 7 de noviembre de 2026
O director de Turismo de Galicia, Xosé Merelles, participou hoxe no foro Conversas: cara un turismo consciente, organizado por Radio Galicia onde reivindicou a hospitalidade dos galegos que se sustenta, avanzou, nos resultados preliminares da Enquisa de Residentes coa que o Goberno autonómico está a analizar a percepción dos galegos fronte a actividade turística.
Como explicou, esta sondaxe elaborada pola Área de Estudos e Investigación de Turismo de Galicia amosa unha valoración global moi positiva. En concreto, nos últimos anos, entre o 86 % e o 90 % dos galegos valora de forma positiva ou moi positiva a presenza de turistas en Galicia. Son porcentaxes que apenas varían desde o ano 2021 e que son maiores naqueles segmentos vinculados directa ou indirectamente co turismo e moi positiva tamén no resto da poboación, indicou.
En concreto, como engadiu, se nos cinguimos a este mesmo ano 2023, a valoración é dun 8,2 entre os que teñen unha relación directa ou indirecta co turismo e dun 7,6 o resto da poboación. Cifras moi boas en ambos casos que nos permiten establecer unha visión global da situación e seguir avanzando para ofrecer un modelo turístico ordenado e sustentable que nos axude a repartir territorialmente os beneficios que o turismo ofrece e incrementar así o grao de satisfacción da sociedade galega, indicou.
Modelo planificado
Como explicou, esta enquisa dirixida aos residentes na comunidade naceu como proxecto piloto no 2020 co obxectivo inicial de coñecer a intención de viaxe dos galegos en contexto de pandemia ao tempo que buscaba medir a súa percepción e valoración respecto da actividade turística e os seus impactos. Nos anos sucesivos e coa recuperación paulatina do turismo, a enquisa estase focalizando na percepción do turismo.
Trátase dunha liña de traballo que se aliñea co noso compromiso por planificar, coñecer a realidade actual e ter unha folla de ruta ordenada que nos permita actuar, engadiu.
Salientou tamén que o Goberno autonómico conta ademais con ferramentas como o Plan Director dos Camiños de Santiago, en marcha desde o ano pasado, ou a futura Estratexia turística 2024-2030 na que xa se está a traballar da man das universidades e o sector para seguir planificando os plans de traballo dos próximos anos.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
