miércoles, 14 de octubre de 2026
A 9ª edición do festival cultural Converxencias Portugal-Galicia homenaxeará a Rosalía de Castro nas localidades de Braga (Portugal), Ponteareas e Santiago de Compostela a través da música, da danza, do teatro, do cine, dos faladoiros, da poesía, das exposicións e das visitas guiadas.
Así o explicou esta mañá o secretario xeral de Política Lingüística, Valentín García, na rolda de prensa onde se deu a coñecer a programación deste certame cultural promovido polo grupo Canto d'Aqui e o Centro de Estudos Galegos da Universidade do Minho, pertencente á Rede de Centros de Estudos Galegos e Lectorados da Xunta, co apoio da Fundación Rosalía de Castro, do concello de Ponteareas e da Rede da GaliLusofonía, entre outras entidades.
O representante da Consellería de Cultura, Educación, FP e Universidades saudou un ano máis a realización deste festival cultural enmarcado nas accións de desenvolvemento da coñecida como Lei Paz-Andrade para o aproveitamento da lingua portuguesa e vínculos coa lusofonía coa que a Xunta promove as relacións cos países de fala portuguesa.
Canda Valentín García tamén participaron no acto Anxo Angueira, presidente da Fundación Rosalía de Castro; Miguel Bouzó, concelleiro de Mocidade e Deportes de Ponteareas; Carlos Pazos e Alberto Paz, responsable e lector do Centro de Estudos Galegos da Universidade do Minho; Gonzalo Constenla, representante da Rede da GaliLusofonía, e Jaime Torres, representante de Canto d'Aqui.
15 días de programación cultural
Como cada ano, este certame cultural programa unha serie de actividades arredor da data de nacemento e de pasamento de Rosalía de Castro e do cantautor portugués José Afonso (Zeca Afonso), respectivamente, estreitando os lazos que unen Portugal e Galicia e evidenciando as semellanzas entre as súas linguas e culturas.
A programación, que reúne nomes soados como os de Iria Estévez, Pedro Jóia, Artur Caldeira, Quico Cadaval ou Augusto Canário, entre outros, abrirase este venres 10 de febreiro en Braga, que acollerá a maior parte das actividades ata o día 24, e desenvolverase paralelamente no concello de Ponteareas ata poñer o broche final en Santiago de Compostela co concerto Tributo a Zeca Afonso e Rosalía de Castro, coa participación de Canto d´Aquí, Iria Estévez e Pedro Jóia, na Cidade da Cultura.
Un total de cinco candidaturas galegas optan como finalistas aos XIX Premios Nacionais de Artesanía, convocados polo Ministerio de Industria, Comercio e Turismo a través da Escola de Organización Industrial (EOI) e a súa área de promoción da artesanía, Fundesarte. Galicia convértese así na comunidade con máis finalistas, con candidaturas en catro das cinco categorías. En concreto, os ceramistas Barreiros Artesanía e a deseñadora e redeira Amalia Puga optan ao Premio Produto, mentres que Sandra Vilas especializada en feltro é candidata por segundo ano consecutivo ao Premio Emprendemento. Na categoría Promociona para Entidades Privadas, resultou finalista a asociación APAMP e a súa marca A Casa Rodante; e no Promociona para Entidades Públicas, é candidata a Fundación Pública Artesanía de Galicia, polo seu proxecto Aprender da tradición. Oficios e técnicas.
O conselleiro de Presidencia, Xustiza e Deportes, Diego Calvo, anunciou que a Xunta vai desenvolver o título II da Lei de Xuventude de Galicia' para mellorar a calidade dos servizos que se prestan á mocidade galega con medidas para 'incrementar o número de monitores nos campamentos ou flexibilizar os requisitos para poder exercer este traballo'. Así se recolle no proxecto de decreto co que se actualiza o segundo título desta normativa que foi avaliado hoxe no Consello da Xunta e que se publicará nos vindeiros días no Diario Oficial de Galicia 'despois dun longo proceso de participación e diálogo cos axentes implicados' a través de distintos espazos de escoita activa.
