miércoles, 28 de octubre de 2026
Festaclown regresa a Vilagarcía de Arousa do 17 ao 21 de agosto cunha vintena de actuacións de compañías e artistas de referencia no mundo do circo, tanto dentro como fóra de Galicia. Durante cinco días sucederanse en diferentes espazos da localidade espectáculos de acrobacias, música, narración e clown, que conforman no seu conxunto un amplo programa escénico para o que a organización conta un ano máis co apoio económico da Xunta.
A implicación da Consellería de Cultura, Educación, FP e Universidades materialízase a través da convocatoria anual de subvencións á organización de mostras de artes escénicas, que neste exercicio mobiliza 200.000 euros. Culturactiva, organizadora do Festaclown, é unha das 13 beneficiarias que se reparten neste 2022 os fondos destas axudas.
O director da Axencia Galega das Industrias Culturais, Jacobo Sutil, participou hoxe na presentación desta nova edición do festival xunto ao seu coordinador, Nacho Fungueiriño, e aos representantes municipais. O acto contou, así mesmo, coa actuación de Con Eles e Clámide.
Na súa intervención, Sutil felicitou a organización pola súa decidida aposta por procurar a implicación do público a través dunha carteleira ao servizo do humor, así como polo compromiso social que atravesa cada ano a súa programación e que neste 2022 porá o foco especialmente nas mensaxes contra a guerra.
Escaparate do circo galego
A estes dous trazos propios que definen a esencia do Festaclown, o representante da Xunta engadiulle o seu labor como escaparate da nosa produción de circo, xa que o seu cartel ofrece unha escolma representativa das formacións galegas especializadas nesta disciplina artística. Estes tres piares, nos que se sustenta a programación, fan do Festaclown un exemplo dos eventos aos que contribúe o Goberno galego dentro da súa liña de apoio a festivais escénicos de carácter profesional considerados estratéxicos, tanto na súa contorna coma no seu ámbito creativo.
Un ano máis, Festaclown converterá Vilagarcía de Arousa nunha gran carpa para recibir artistas e compañías galegas tan destacadas como Desastronauts, Fran Boza, Troula ou Dani García e grandes nomes a nivel nacional e internacional como Cía Vaya, Entre Nous, Rojo Telón, Trotamundos, Kanbahiota ou Javier Ariza.
O espectáculo inaugural celebrarase o mércores 17 de agosto ás 11,00 h. na praza de Galicia, da man de Pallasos en Rebeldía, Desastronauts e Clámide coa colaboración especial do Centro de Atención Integral Princesa Leticia Amencer. Ese será o inicio oficial dun festival que contará cunha actuación previa para quecer motores. Celebrarase o sábado 13 ás 21,00 h. na praza da II República e consistirá nun espectáculo conxunto organizado por Culturactiva xunto á Banda Municipal de Vilagarcía de Arousa baixo o título Desconcerto.
Gala solidaria
Un dos pratos fortes deste ano será a Gala Solidaria que correrá a cargo de Pallasos en Rebeldía e que se celebrará o domingo 21 como colofón da programación. Neste evento manifestarase o compromiso pacifista de Festaclown, que este ano inclúe diferentes espectáculos con mensaxes contra a guerra. É o caso de pezas como Sen Guerras, que a compañía Clámide ofrecerá xunto a Asociación Con Eles o venres 19; SMILE, espectáculo da formación asturiana De Carmela que se verá tamén o venres, ou Contos pola paz, actuación de Anxo Moure prevista para o sábado 20.
O festival desenvolverá, ademais, unha nova edición do Certame Festaclown, que converterá o público no xurado deste premio que recoñecerá o mellor espectáculo. O galardón concédese a través das votacións nas que poderán participar as persoas de todas as idades que asistan ás funcións.
O proxecto Xenoma Galicia, que conta cun investimento de 20 millóns de euros, ten por obxecto recompilar o ADN de 400.000 galegos para identificar os xenes relacionados co cancro de mama e ovario hereditario, a síndrome de Lynch e a hipercolesterolemia familiar. Ata o de agora, foron analizadas 3.112 mostras biolóxicas. En concreto, 1.037 mostras de sangue na primeira pilotaxe do proxecto, 796 de saliva no segundo piloto e, coa primeira fase do proxecto en marcha, 1.279 mostras dos voluntarios dos primeiros distritos participantes. A análise das mostras destes 1.279 participantes da fase 1 permitiu detectar 25 novos casos positivos. En concreto, 14 participantes deron positivo en cancro de mama e ovario hereditario, dous na síndrome de Lynch e nove en hipercolesterolemia familiar.
A Pedreira e Fillas de Cassandra estarán presentes no Womex 2026, o máis importante encontro mundial das músicas folk e de raíz que se celebra ata este domingo en Las Palmas de Gran Canaria. Trátase dunha iniciativa que ofrece aos artistas e ás empresas galegas un espazo para dar a coñecer o seu traballo ante programadores, festivais, axencias de contratación e outros profesionais de diferentes países. A artista foi escollida por un xurado internacional independente para formar parte dos Official Showcases, a selección oficial de concertos coa que Womex achega aos profesionais propostas das músicas do mundo.
