sábado, 7 de noviembre de 2026
O secretario xeral de Política Lingüística, Valentín García, presentou hoxe o ciclo de concertos Mar de Mulleres, enmarcado nos actos conmemorativos polo 25N-Día internacional contra a violencia de xénero e realizado ao abeiro do Fondo de Proxectos Culturais Xacobeo 21-22 da Xunta de Galicia. A través desta iniciativa, artistas galegas, entre as que figuran tanto solistas como bandas emerxentes, presentarán os seus proxectos musicais ata o domingo no Museo do Mar de Galicia.
Valentín García animou os vigueses e a toda a cidadanía galega interesada a acudir a un concerto co que simbolicamente, e a través da voz destas cantantes e músicas galegas, queremos alzar a nosa propia voz acerca dos dereitos das mulleres e contra a violencia de xénero. Canda o representante da Consellería de Cultura, Educación e Universidade tamén interviñeron nesta presentación, Marta Lucio, directora do museo vigués, e as compoñentes do grupo Leilía, encargadas de abrir o ciclo.
Un programa con nome de muller
Tras a actuación do grupo de música tradicional Leilía será a quenda de Belém Tajes, quen, despois de ser vocalista con Luar na Libre e Vudú, presentará o seu proxecto no museo vigués mañá, ás 20,00 horas. Compartirá escenario con Su Garrido, cantante, música e compositora galega que abrangue diversos xéneros con matices de bossa, folk, jazz ou latin.
O concerto previsto para o sábado 27 será en horario de mañá, ás 12,00 horas, e estará protagonizado por Blues do País, a banda liderada por Bieitta James e que fai versións de clásicos do blues e do soul adaptadas á idiosincrasia e retranca galegas. Xunto a ela actuará o dúo Mallou, liderado por Sabela Bello, co seu novo proxecto no que reinterpreta a tradición da música popular de Galicia.
A viguesa Margarida Mariño, co seu primeiro traballo en solitario, e Mounqup, francesa residente en Galicia que apostou pola música en galego, poranlle o peche ao ciclo o domingo, tamén ao mediodía.
Con esta iniciativa, o Goberno galego busca darlles visibilidade ás artistas emerxentes e á música na lingua propia, ademais de conmemorar, como cada 25 de novembro, o Día internacional contra a violencia de xénero. As entradas para todos os pases serán de balde ata completar a cabida.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
