viernes, 6 de noviembre de 2026
O xerente de Galicia Calidade, Alfonso Cabaleiro, foi o encargado de presentar a cociñeira propietaria do restaurante A Tafona, de Santiago de Compostela, que tamén conta coa marca de calidade. Durante a súa intervención, Alfonso Cabaleiro agradeceu a boa disposición de Lucía Freitas para participar neste proxecto e amosouse convencido de que servirá para crear futuras sinerxías de traballo entre os cociñeiros galegos que hoxe se forman nas escolas de hostalería e os produtos e empresas galegas que apostan pola calidade como un referente máis á hora de presentarse ao público.
Máximo rendemento
No decurso dunha master class dirixida a preto de 20 alumnos e alumnas de 2º curso de Gastronomía do CIFP Compostela, Lucía Freitas amosou o seu modo de facer e de sacar o máximo rendemento e sabor aos produtos de Galicia Calidade a través da elaboración dun menú integrado por empanada líquida de millo e berberecho de Noia; croquetas cremosas de sardinillas afumadas e pementos de Herbón; capuchino de caldo de gloria; curri de fabas de Lourenzá e polbo das rías galegas; pescada de Celeiro a 45ºC con tubérculos e anisados silvestres e kiwi de Galicia con chocolate branco e albahaca.
Durante a sesión formativa, os alumnos interesáronse polo proceso de cocción dos distintos produtos, así como pola maridaxe e a configuración de menús contemporáneos.
As empresas de Galicia Calidade participantes nesta primeira experiencia con alumnos de hostalería son Cabo de Peñas, Jamones González, Torre de Núñez, Terras da Mariña, Sociedade Cooperativa Custom Drinks, Gallego Pereira, Puerto de Celeiro, Patatas Conde e Kiwi Atlántico. Todas elas cederon os seus produtos para que os futuros restauradores galegos os coñezan e valoren as súas características
Traxectoria profesional
Lucía Freitas é unha das cociñeiras máis relevantes da gastronomía galega actual. Tras estudar no Centro Superior de Hostalería de Artxanda, en Bilbao, continuou a súa formación en restaurantes coma o Celler de Can Roca, en Girona; Bohío, en Illescas; Mugaritz, en Errentería (Guipúzcoa); e Tapies (Lérida). En 2009, abriu en Santiago o seu restaurante A Tafona, un establecemento certificado por Galicia Calidade, onde realiza unha cociña elaborada para o público compostelán, galego, nacional e internacional.
A cociñeira galega tamén realizou unha incursión en Estados Unidos da man do seu restaurante Tomiño, que abriu en 2017. Lucía Freitas conta con numerosos recoñecementos gastronómicos nacionais entre os que se atopa a estrela Michelín.
Galicia Calidade continuará coa Aula Gastronómica o vindeiro 15 de abril no CIFP Carlos Oroza de Pontevedra da man da restauradora María Varela. O 22 de abril, a Aula Gastronómica Galicia Calidade chegará a Vigo, concretamente, ao CIFP Manuel Antonio, con Iñaki Bretal. A experiencia rematará o 8 de xuño no IES de Foz, onde participará Yayo Daporta.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
