miércoles, 12 de agosto de 2026
Despois de que a pandemia obrigase a suspender o proceso electoral previsto para o 5 de abril, e co compromiso de activalo de novo no prazo máis breve posible, Feijóo trasladou hoxe o contido dos informes sanitarios -informe da área de Saúde Pública da Xunta, do presidente da Sociedade Galega de Medicina Intensiva, do presidente da Sociedade de Urxencias e Emerxencias de Galicia e do xefe de enfermidades infecciosas do CHUAC- e do informe da Asesoría Xurídica da Xunta, encamiñados a orientar unha decisión que non é, en ningún caso, sinxela.
Así, desde o punto de vista sanitario, e sempre que se manteñan as previsións, o presidente da Xunta trasladou que os expertos coinciden en que o momento que pode ofrecer menos incertezas para poder votar é o principio do verán, sendo a seguridade sanitaria maior canto antes se celebren os comicios. Pola contra, as incertezas increméntanse canto máis avance o ano, restando garantías para que se poida celebrar un proceso electoral en condicións sanitarias axeitadas.
Sobre este último punto, explicou, entre outros aspectos, que os meses de maior recepción de visitantes na Comunidade son xullo e agosto, o que pode expoñernos a máis contaxios importados; as condicións meteorolóxicas do verán -temperaturas maiores, raios ultravioleta- poderían contribuír a reducir o impacto do virus; e os modelos epidemiolóxicos non descartan un novo pico da enfermidade con máis probabilidade despois do verán, engadiu.
O responsable do Executivo galego resaltou que o informe xurídico subliña que se dan as condicións xurídicas para a convocatoria e celebración dunhas novas eleccións, considerando que se se estima que as condicións poden ser peores no outono, o prudente e correcto é proceder a unha nova convocatoria á maior brevidade, para non poñer en perigo o dereito fundamental do sufraxio activo e pasivo.
En definitiva, a Asesoría Xurídica indica que as eleccións poderían convocarse á maior brevidade; e os informes sanitarios conclúen que o mellor momento para a celebración das eleccións conta con maiores garantías a principios do verán que a finais do verán, expuxo.
A Xunta segue traballando na prioridade: a loita contra a pandemia
En calquera caso, Feijóo aseverou que o Goberno galego segue traballando na prioridade, que non é outra que a loita contra a pandemia e a reactivación social, laboral e económica das familias e das empresas galegas. En Galicia contivemos máis o virus pero, mentres non haxa unha vacina, segue existindo agora, seguirá existindo en xullo e seguirá existindo en setembro; e esta obrigada convocatoria electoral non vai variar a prioridade da Xunta, nin a de -estou convencido- os partidos políticos de Galicia, aseverou, subliñando que esta mesma semana espérase contar cos resultados definitivos da primeira ola do informe epidemiolóxico, cuxos primeiros datos permiten chegar a unha conclusión: Galicia contivo máis o virus e a poboación galega afectada sitúase no entorno do 1%.
Nesta mesma liña, destacou que a Administración autonómica xa ten practicamente ultimado un protocolo de reactivación sociosanitaria referido a centros de día, de maiores e de discapacidade; cun marco de actuación xeral e liñas específicas para garantir a apertura paulatina, gradual e segura.
A semana pasada aprobamos un protocolo sobre a reactivación da Atención Primaria e este luns aprobamos tamén: un protocolo para a reactivación da actividade ordinaria hospitalaria, un protocolo clínico asistencial para o uso de plasma hiperinmune e un protocolo de finalización na realización das probas test a todos os profesionais -sanitarios e non sanitarios- do Sergas, engadiu, ademais da aprobación dun plan para garantir a reincorporación dos empregados públicos ao traballo presencial de forma gradual e segura.
Por último, Feijóo incidiu tamén na necesidade de evitar as improvisacións no eido educativo. Ao respecto, resaltou a xuntanza que a Consellería manterá esta tarde con anpas e sindicatos para abordar a posición de Galicia ante a Conferencia sectorial que terá lugar mañá. É imprescindible coñecer os protocolos de volta ás aulas, saber como se vai iniciar o vindeiro curso e tamén, como e en que casos se poden retomar parcialmente as tarefas educativas no que queda de curso, recalcou.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
