sábado, 7 de noviembre de 2026
O presidente do Goberno galego, Alberto Núñez Feijóo, informou hoxe, na rolda de prensa posterior ao Consello, do inicio da tramitación do decreto que regulará o censo do solo empresarial e converterá a Galicia nunha das primeiras CCAA en dispoñer desta información exhaustiva e actualizada para facilitar a creación de empresas.
En concreto, e co obxectivo de ter mellor información sobre o total de solo empresarial dispoñible no conxunto da Comunidade, será obrigatoria e gratuíta a inscrición no censo de todas as áreas empresariais existentes en Galicia que teñan parcelas dispoñibles para a súa comercialización e tamén das áreas previstas para o seu inmediato desenvolvemento. Deste xeito, a obriga comprende a todas as áreas empresariais independentemente de que sexan propiedade de persoas físicas ou xurídicas.
Máis polo miúdo, Feijóo sinalou que o censo deberá incluír en cada caso a oferta dispoñible, individualizada por parcelas, o tipo de espazo dispoñible e os seus usos, así como os cambios que se produzan desas parcelas, que deberán ser comunicados no prazo dun mes.
En canto ao procedemento que deben seguir estas áreas, o presidente da Xunta subliñou que no caso das existentes, disporán de 3 meses para solicitar a súa inscrición desde a entrada en vigor do decreto, e no caso das novas actuacións, o prazo máximo será dun mes. Finalmente, e no caso de incumprimento, dixo, as sancións oscilarán entre os 1.000 e 10.000 euros.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
