Notas de prensa

Destácase a coordinación e integración do sistema galego de servizos sociais en Lisboa

A conselleira de Traballo e Benestar, ante responsables europeos en Lisboa onde participou nunha mesa redonda da sesión plenaria da 23 Conferencia europea, destacou 5 fitos: a coordinación sociosanitaria, o novo modelo de carteiras, a inclusión activa, as novas tecnoloxías, e a loita contra a crise demográfica.

A conselleira de Traballo e Benestar, Beatriz Mato, expuxo ante responsables europeos as principais características do sistema galego de servizos sociais, entre as que destacou especialmente a súa “coordinación e integración”. O obxectivo, proseguiu, é contar cuns “servizos eficaces e eficientes”.

Así o salientou durante a súa participación na mesa redonda da sesión plenaria da 23 Conferencia europea de servizos sociais que se está a celebrar desde o luns e ata hoxe en Lisboa. Esta iniciativa, organizada anualmente pola Rede Social Europea (ESN), ten como tema principal este ano “estimular a colaboración para mellorar en vidas”.

A mesa redonda na que participou Mato centrouse en cómo unha asistencia integrada centrada nas persoas pode mellorar os resultados, e como grazas á cooperación é posible prestar servizos de maneira máis coordinada e eficaz.

Na súa intervención, a conselleira fixo fincapé en cinco fitos fundamentais: a coordinación sociosanitaria, o novo modelo de carteiras, a aposta pola inclusión activa, o fomento das novas tecnoloxías, e a loita contra a crise demográfica. Ademais, puxo en valor experiencias de coordinación, como o Proxecto Symbios en materia de demografía ou a Eurorrexión Galicia-Norte de Portugal.

En canto á coordinación, un dos temas principais da Conferencia, apuntou que é preciso “superar a tradicional idea de curar —vinculada á sanidade—, para engadirlle a de previr e coidar —ligada aos servizos sociais—”. De aí que Galicia teña apostado pola coordinación sociosanitaria, un esforzo que se ten plasmado en documentos como o Plan de atención sociosanitaria, a Estratexia de cronicidade ou a de Prevención da dependencia.

Tamén neste mesmo eido da coordinación, valorou a necesidade de integrar “emprego e benestar”, un avance que se reflicte no compromiso da Xunta coa “inclusión activa”, que busca ofrecer aos beneficiarios unha “saída definitiva” ás situacións de risco. Para conseguilo, entre outras actuacións, articulouse unha nova Risga na Lei de inclusión social, creáronse programas innovadores de contratación de persoas perceptoras desta prestación, e estanse a elaborar itinerarios personalizados de inserción.

Con todo, a conselleira sinalou que a coordinación non se limita só a establecer sinerxías entre departamentos, senón en aproveitar tamén o traballo en rede con outros territorios, como se está a facer na loita contra a crise demográfica. Nesta materia, apostouse polo esforzo conxunto, a través do Plan de dinamización demográfica, pero tamén se impulsou a creación en España dun Foro de rexións con desafíos demográficos (Fredd) que, ademais de buscar solucións en común, expuxo esta problemática ante as máis importantes instancias europeas e estatais.

Nesta mesma temática, Galicia lidera tamén o Proxecto Symbios, que ten como meta atopar solucións contra as situacións de exclusión territorial xeradas pola crise demográfica. A comunidade autónoma é, ademais, membro da Rede de rexións afectadas polo cambio demográfico (DCRN), xunto con outras 40 rexións europeas.

Galicia-Norte de Portugal

Na colaboración interrexional, é tamén importante destacar o traballo “especialmente notable” que se desenvolve na Eurorrexión Galicia-Norte de Portugal, no marco do Poctep (Programa operativo de cooperación transfronteiriza España-Portugal). No seu seo, téñense impulsado importantes proxectos en diversos eidos como o sanitario, o social ou o laboral, a través de iniciativas como o Envellecemento máis activo, para a mellora das condicións de vida dos maiores e a innovación tecnolóxica; ou, en materia de emprego, o Eures Transfronteirizo, que xoga un importante papel na mobilidade laboral dos traballadores da Eurorrexión. Tamén existe outras actuacións como o NACCE, dirixida ao fortalecemento dos sectores TIC.

Ademais da coordinación, Mato apostou pola “especialización” nos servizos sociais co fin de prestar unha atención adaptada ás “necesidades reais” das persoas. Neste campo, Galicia puxo en marcha o novo modelo de carteiras, que inclúe un total de catro: para persoas en situación de dependencia (xa en funcionamento), para persoas con autonomía, para familia e infancia, e para a inclusión.

Xa por último, a conselleira afirmou que “para lograr unhas políticas sociais máis eficientes hai que contar con esa gran ferramenta que son as novas tecnoloxías”. O seu uso permite axilizar todos os trámites, facilitar as xestións, e optimizar o investimento social. Supoñen tamén un avance na prestación de servizos, especialmente en ámbitos como a prevención da dependencia, o envellecemento activo ou a autonomía persoal. Así, sistemas avanzados de teleprevención como Miavizor, SAM-TV ou Telexerontoloxía supoñen un “paso máis” sobre a teleasistencia tradicional. As novas tecnoloxías tamén permiten outros avances como o expediente dixital; o informe social unificado; ou a historia social única na que se está traballando actualmente, e que constitúe un paso previo á historia sociosanitaria única.

Mesa redonda

A mesa estivo presidida por Hugh Frazer, profesor adxunto de Estudos Sociais Aplicados da Universidade de Maynooth (Irlanda) e coordinador da Rede Europea de Política Social. Entre os participantes, ademais da conselleira, estivo o Ministro de Sanidade de Portugal, Paulo Macedo; o vicepresidente do comité de protección social da Unión Europea, Muriel Rabau; a secretaria de Estado para Asuntos Sociais e Emprego dos Países Baixos, Jetta Klijnsma; a secretaria de Estado para a Pobreza, Igualdade de Oportunidades e Persoas con discapacidade de Bélxica, Elke Sleurs; o xefe da unidade de inclusión social e redución da pobreza da Dirección Xeral de Emprego, Asuntos Sociais e Inclusión da Comisión Europea, Stefan Olsson; e o presidente da Asociación de directores dos servizos sociais para adultos de Inglaterra, Ray James

Ao longo de toda a conferencia, interviron responsables políticos de alto nivel, entre os que se atopan, entre outros, o Ministro de Solidariedade, Emprego e Seguridade Social de Portugal, Pedro Mota; a Comisaria de Emprego, Asuntos Sociais, Capacidade e Mobilidade laboral, Marianne Thyssen, ou a Ministra de Familia e Integración de Luxemburgo, Corinne Cahen.

Gabinete de Comunicación da Xunta de Galicia, 2015-07-08

Actualidad

Foto del resto de noticias (tecnoloxia-mobil.jpg) En torno ao 75% do alumnado galego de 5º e 6º de Primaria e de ESO dispón de teléfono móbil e a maioría conéctase a internet practicamente a diario, segundo se desprende da V Enquisa de diagnose da convivencia 2025. O estudo consta dun amplo bloque sobre a convivencia nos centros escolares tanto para alumnado de ensino obrigatorio (Primaria e ESO) como postobrigatorio (Bacharelato e Formación Profesional) e outro bloque enfocado aos hábitos sociais do alumnado, que se introduciou por primeira vez na enquisa de 2023. Arredor do 90% do alumnado (91,6% dos estudantes de 5º e 6º de Educación Primaria, o 84,33% dos de ESO e os 78,83% dos de ensinanzas postobrigatorias) afirman que nunca ou case nunca recibiu condutas intimidatorias por estes medios.
Foto de la tercera plana (reinventio.jpg) Reinventio combina números de ilusionismo, acrobacias e danza contemporánea nunha proposta de 90 minutos que aborda a ilusión, a superación e o espírito transformador do Camiño de Santiago. A dirección artística corre a cargo do ilusionista ferrolán Martín Varela, xunto coa coreógrafa Mercedes Suárez e a compañía Druida Danza, profesionais galegos de ampla traxectoria que integran elementos de danza clásica e contemporánea con técnicas circenses innovadoras, acompañadas dun coidado deseño escenográfico, musical e lumínico que reforza o carácter visual e emocional do espectáculo.

Notas

Baixo o nome de Dorna, unha embarcación típica das Rías Baixas, comezou a navegar no océano literario do ano 1981 unha nova revista de creación literaria que pretendía “ofrecer unha canle editorial a autores e autoras noveis con arelas no cultivo da literatura galega”, malia recoller tamén “a voz de escritores e escritoras xa consagrados”. Así describen dende Edicións USC a meta que perseguía e persegue esta revista que case medio século despois permanece viva baixo a dirección da profesora Mª Xesús Nogueira.
Tras o éxito da súa primeira edición en 2021, o II Congreso Internacional 'A viaxe a través da palabra' consolidouse como un espazo de diálogo entre literatura, creación, investigación, turismo e industrias culturais. O encontro, celebrado os días 16, 17 e 18 de outubro, reuniu a numeroso persoal experto de recoñecido prestixio que abordaron o concepto da viaxe como espazo de intercambio e comunicación.
PUBLICIDAD
ACTUALIDAD GALICIADIGITAL
Blog de GaliciaDigital
HOMENAXES EGERIA
PUBLICACIONES