Notas de prensa

A Rede CRUSOE colabora no impulso da macrorrexión do Atlántico e crea AURA, a nova alianza universitaria rexional

A Comisión Europea fixou o mandato de crear a macrorrexión do Arco Atlántico antes de xuño de 2027, un fito no que CRUSOE colabora xunto á Conferencia de Rexións Marítimas Periféricas de Europa (CPMR) e a Comisión Arco Atlántico. As tres institucións elaboran a folla de ruta e definen as prioridades de investigación das súas universidades.

“Esta decisión é o resultado dun profundo traballo realizado durante moitos anos polas rexións membros da Comisión Arco Atlántico”, sinalou Imanol Pradales, lehendakari do País Vasco e presidente da Comisión Arco Atlántico, durante a presentación deste punto na Asemblea da Comisión.

AURA, unha alianza interuniversitaria “que une dúas beiras”

Os asistentes ao pleno aprobaron o documento de presentación e o Memorándum de Entendemento (MoU) para a constitución da Alianza Universitaria da Rexión Atlántica (AURA). Esta iniciativa é impulsada conxuntamente pola Comisión Arco Atlántico, CRUSOE e a Universidade do País Vasco/Euskal Herriko Unibertsitatea (UPV/EHU).

Baixo o lema ‘O saber que une dúas beiras’, AURA nace co obxectivo de conectar universidades, coñecemento e territorio no espazo atlántico europeo. No futuro, prevé estenderse progresivamente a rexións como Nova Aquitania, Navarra, País Vasco, Andalucía, o sur de Portugal, Gales, Irlanda e Quebec. A tal propósito, o itinerario da alianza contempla tres fases: a identificación de colaboracións xa existentes, o establecemento de vínculos entre as universidades do Arco Atlántico e a ampliación da Rede a outras institucións coas que comparta zona xeográfica.

Este compromiso de futuro súmase a outros dous acordos xa asinados nos últimos meses para reforzar a presenza atlántica de CRUSOE: o MoU coa Fundación eAtlantic, centrado no reforzo da fachada Atlántica Europea; e o MoU coa Universidade do País Vasco/EHU para conformar a Rede de Universidades do Arco Atlántico.

Unha rede científica en plena expansión

O presidente executivo da Secretaría Xeral de CRUSOE, Salustiano Mato, deu a coñecer a actividade desenvolvida polos dez grupos de traballo da Rede, que reúne a 150 institucións e máis de 350 colectivos de investigación. No último ano, presentaron 13 propostas a programas europeos e outras 18 atópanse en fase de estudo.

Patrimonio Cultural Dixital: avanza a Cátedra UNESCO ITACA sobre IA aplicada ao patrimonio cultural. Aprobada nunha primeira fase nacional, está pendente da resolución da Unesco. Para a súa consolidación, asínase un convenio marco coa Organización de Estados Iberoamericanos (OEI).
Sistemas Agroalimentarios: establécense novos convenios co Observatorio do Dereito á Alimentación de España e a Universidade Agraria da Habana (Cuba).
Mobilidade e Transporte Intelixente: o I CRUSOE Sustainable Mobility Forum organizado en Santander o pasado xaneiro contou con máis de 50 expertos.
Enerxía Sostible; Auga; Sociedade Dixital; Vida Sana, Envellecemento e Lonxevidade; Transición Ecolóxica e Cambio Global; �mbito Mariño e Marítimo; e InTeDeMo: condensan unha intensa actividade de xornadas e congresos mentres traballan en paralelo sobre a posta en marcha de novas propostas europeas.

CLIMPACT, DHI Accelerator e HeatSense son tres as propostas europeas que xa recibiron unha avaliación positiva. En concreto, HeatSense faino coa máxima puntuación posible no criterio de impacto.

Renovación do Comité Executivo

A Asemblea aprobou a creación da Comisión de coordinadores dos seus Grupos de Traballo, o que dará lugar ao novo Consello Científico da Rede CRUSOE, e procedeu á renovación do seu Comité Executivo. Así, o novo presidente será Artur Silva, reitor da Universidade da Aveiro, e a vicepresidencia recaerá en Ignacio Villaverde, reitor da Universidade de Oviedo. O reitor da UDC; Ricardo Cao, renova o seu cargo como secretario xeral, igual que Salustiano Mato, que repite como presidente executivo da Secretaría Xeral Técnica.

Os vogais, que son seis, serán a anterior presidenta da Rede, Concepción López, da Universidade de Cantabria, o reitor da Universidade de Burgos, José Miguel García, a reitora da Universidade de León, Nuria González, Alexandra Malheiro, presidenta do IPCA (Instituto Politécnico do Cávado e do Ave) e Pedro Arezes, reitor da Universidade do Minho.

De acordo co establecido nos seus estatutos, ratificou tamén a memoria económica do exercicio 2025. Estes requisitos, en liña cunha gobernanza transparente, marcan o inicio do proceso de organización da próxima Asemblea Xeral, prevista para 2027.

Próximas citas da rede

Xornada ODA-CRUSOE — 20 e 21 de xullo de 2026, Universidade de Vigo.

Resolución da Cátedra UNESCO ITACA — prevista entre maio e xullo de 2026.

Congreso ‘Auga e Sustentabilidade’, con sesión CRUSOE — 24 e 25 de setembro de 2026, Centro Universitario de Investigación e Desenvolvemento da auga (COIDA), Oviedo.

Heritage & Wine I3, candidatura europea coordinada por CRUSOE — novembro de 2026.

Sobre CRUSOE

A Rede CRUSOE é unha asociación sen ánimo de lucro e de ámbito internacional integrada polas Universidades de Galicia, Castela e León, Asturias, Cantabria, Rexión Norte e Rexión Centro de Portugal. Agrupa a 29 entidades de educación superior, máis de 600 grupos de investigación de referencia nacional en España e Portugal, e case 240.000 estudantes repartidos en máis de 40 campus.

Desde a súa creación en 2011, CRUSOE traballa para redefinir un espazo multidisciplinar de colaboración académica en materia de investigación e innovación. O seu obxectivo consiste en contribuír á potenciación e mellora da educación superior e do desenvolvemento territorial, a través da cooperación interuniversitaria, o diálogo entre universidades e axentes sociais, e a cooperación institucional con gobernos rexionais e estatais.