domingo, 8 de noviembre de 2026
Desde o Centro de Investigación Mariña da Universidade de Vigo (CIM) o grupo de Fisioloxía de Peixes (PhysToFish), liderado polo catedrático José Luis Soengas, leva anos avanzando nestas cuestións, un traballo que agora toma novos folgos coa consecución do proxecto de investigación FishFedEx sobre alimentación e gasto enerxético en peixes teleósteos, financiado con máis de 700.000 euros dentro do Plan nacional de I+D+i, dos que 256.250 euros lle corresponden á UVigo, que coordina o proxecto; 243.750 euros, ao Instituto de Acuicultura Torre de la Sal do CSIC, e 233.750 euros á Universidad Complutense de Madrid, os outros dous membros do consorcio.
O proxecto promoverá un cambio de concepto na forma en que se consideraron ata a data a alimentación e o gasto enerxético dos peixes ao abordar os factores involucrados na estimulación (palatabilidade e gusto) do consumo de alimento, así como os desafíos relacionados co clima e o medio ambiente, explica o coordinador. Por outro lado, engade que a mellora do deseño de estratexias de alimentación tamén fortalecerá a competitividade do sector acuícola español, que é un dos principais obxectivos da contribución de España ás Directrices estratégicas para una acuicultura de la UE más sostenible y competitiva 2021-2030, producindo un incremento no número e a calidade dos postos de traballo asociados a este sector.
A iniciativa, segundo indica Soengas, tamén estudará o impacto nocivo da cronodisrupción, servindo así de guía no deseño de políticas de benestar dos peixes. Por todo iso, os resultados da proposta favorecerán, segundo o seu parecer, ao desenvolvemento dunha acuicultura sostible, responsable, resiliente, innovadora e competitiva, contribuíndo á Axenda 2030 das Nacións Unidas para os Obxectivos de Desenvolvemento Sostible.
Novas liñas de investigación e novas metodoloxías
En concreto, a iniciativa busca abrir liñas de investigación novas en peixes, como a caracterización dos mecanismos do gusto e a súa sinalización ao cerebro, a modulación da alimentación por produtos da microbiota, a modulación da motilidade e detección intestinal, a relación da serotonina periférica co sistema inmunolóxico, a modulación do gasto de enerxía ou o impacto dos desafíos ambientais na regulación da alimentación. Doutra banda, poderanse desenvolver novas metodoloxías para ser utilizadas en peixes, como o illamento de células gustativas e enteroendocrinas, medicións de preferencia de lugar de alimentación e ansiedade, ou ferramentas non invasivas e de telemetría para monitorizar o benestar. Igualmente, estudaranse as condicións de benestar dos peixes con información sobre nutrientes que melloran a palatabilidade, condicións ambientais (luz, temperatura, contaminantes) que perturban ou favorecen a regulación da alimentación, ou factores periféricos que modulan a preferencia dietética. Por último, desenvolveranse novas ferramentas, como liñas transxénicas para o estudo das vías gustativas centrais e posibles compostos anti-disuasores e para comprender o papel da detección de ácidos graxos e os sistemas circadiano e de recompensa na inxesta de alimento.
O consorcio que impulsa o proxecto leva máis de 20 anos colaborando
O consorcio de grupos de investigación Fish Feeding Physiology Group está formado polo grupo Fisioloxía de Peixes (PhysToFish), do CIM, liderado por José Luis Soengas; Neuroendopez, da Facultade de Bioloxía da Universidad Complutense de Madrid, liderado por Nuria de Pedro e Esther Isorna; e Fish neurobehaviour Lab, do Instituto de Acuicultura Torre de la Sal do CSIC, liderado por José Miguel Cerdá-Reverter. Xuntos levan máis de 20 anos traballando, a través de proxectos de investigación coordinados do Plan nacional de I+D+i no campo da regulación da alimentación en peixes e o seu impacto na acuicultura.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
