jueves, 2 de mayo de 2024
A directora de Turismo de Galicia, Nava Castro, compareceu hoxe ante a Comisión 6ª do Parlamento de Galicia para dar conta do balance turístico da nosa comunidade no 2022, onde expuxo que Galicia bateu récords históricos de ocupación turística, logrando superar nun 40% as cifras do ano 2021.
Durante a súa intervención, Nava Castro puxo en valor o modelo turístico galego, baseado nun turismo baseado na colaboración público-privada, tranquilo e de calidade, fomentando valores paisaxísticos, patrimoniais e enogastronómicos, o que segundo indicou, axudou a favorecer a recuperación da demanda turística.
Avanzou que Galicia mellorou tamén as súas cifras con respecto ao conxunto do Estado, cunha ocupación oito puntos maior respecto da media e manténdose como o sétimo destino máis importante, unicamente por detrás de Canarias, Cataluña, Baleares, Andalucía, a Comunidade Valenciana e Madrid.
Destacou tamén, que este ano se avanzou na desestacionalización do sector, conseguindo cifras nunca acadadas. Así, explicou que o 38% da demanda concentrouse na temporada alta -meses de xullo e agosto-, ficando a porcentaxe restante repartida entre a temporada media -o 38%- e baixa -co 24% neste caso-.
Ao peche da temporada turística do 2022, o 75% da demanda corresponde ao turismo de ámbito nacional que engloba ao interno e ao que procede das restantes comunidades autónomas- mentres que o 25% restante é internacional.
Tanto o turismo nacional como o internacional superan de forma notable as cifras do pasado ano -nun 22% o nacional e en máis do dobre o internacional. Cabe destacar que o segmento dos españois consegue superar tamén o nivel de 2019 -nun 4,4%-, marcando un máximo da serie histórica con preto de 9,4 millóns de noites.
Grazas a todo elo, Galicia superou por vez primeira na serie histórica a barreira dos 12 millóns de noites no total anual, debido á excelente capacidade de recuperación da demanda que mesmo permite superar as cifras de 2019 e a incorporación ao cómputo global dos albergues -que engaden máis de 1,3 millóns de noites ao conxunto total-.
Finalmente, indicou que o proceso de recuperación do Camiño de Santiago consolidouse durante o 2022 marcando unha cifra récord nunca antes acadada, con 438.682 compostelas entregadas, o que supuxo un incremento dun 26% con respecto á anterior cifra máis alta acadada no 2019 con case 350.000 certificacións.
O director xeral de Relacións Exteriores e coa UE, Jesús Gamallo, reuniuse esta mañá cos responsables da AECT Rio Minho para coñecer de primeira man as prioridades e os proxectos que ten en marcha este instrumento de cooperación que abrangue 16 concellos da provincia de Pontevedra e 10 da CIM Alto Minho. Esta é unha primeira visita que o director xeral de Relacións Exteriores e coa UE, Jesús Gamallo, continuará co resto de AECTs. Deste xeito, está previsto que se entreviste tamén cos responsables da AECT Chaves-Verín, e da futura AECT da Raia Seca.
A Cidade da Cultura volve acoller a colorida e festiva carreira Holi Gaiás, que vai pola súa sexta edición. A proba terá lugar o 8 de xuño nos exteriores do complexo e contará cun percorrido especial para a cativada entre 4 e 9 anos, a Peque Holi. A actividade contará un ano máis coa súa tradicional poeira de cores e con animación previa e posterior á proba, con música e coreografías que animarán aos participantes. O obxectivo é gozar coa práctica deportiva nun enclave como é Gaiás, coa súa característica arquitectura e co seu gran pulmón verde, o Bosque de Galicia.
