Romeo e Xulieta

Nun momento do seu dietario El quadern gris, o escritor catalán Josep Pla dá o seu parecer sobre o contido dos programas escolares. Pla fai reconto das ensinanzas que reciben os nenos na escola: aprenden historia e gramática, aritmética e física, ximnasia e idiomas estranxeiros. Dito isto, o autor catalán pregúntase por que os escolares non reciben leccións de idealismo, de cordialidade e de amor. Transcribo as súas palabras: “Os programas escolares son suficientemente pouco prácticos para que estas materias se puidesen engadir sen que sufrise a moralidade xeral.

Mentres Romeo e Xulieta de Skakespeare non forme parte dos programas escolares, os homes e as mulleres sairán das escolas sabios pero vulgares”. É certo que hoxe a obra de Skakespeare se estuda na escola. Pero coido que non temos que quedar na literalidade das palabras de Josep Pla: como é sabido, a metáfora é un recurso que domina perfectamente este autor catalán. Aclarado este punto, permitídeme que engada uns comentarios do cantante Manolo García nunha entrevista que na miña opinión están en plena consonancia coa formulación de Pla: “Ninguén me ensinou a superar o desamor, a enfrontarme á morte dun familiar. Non se nos ensina a ser nin a desaparecer; só se nos ensina a gastar”...

Viva o idealismo, a cordialidade e o amor, logo.