Despedida

Mensaxe de despedida de Juan Carlos Fernández Fasero

Desde que teño uso de razón e “sentidiño” traballei pola cultura e vivín da cultura. Primeiro como autor, despois como músico, logo como empresario e desde o 3 de xullo de 2009 até hoxe, como membro do Goberno da Xunta de Galicia.

Este feito, para min, supón unha gran honra e unha gran responsabilidade. Honra por poder traballar para todos os galegos e responsabilidade por traballar no que foi, é e será a miña paixón: a cultura.

Non podemos dicir que esta estea a vivir o seu mellor momento. Pero non só pola crise, xa que a crise aféctalle a todo, senón tamén pola desvalorización que o propio concepto de cultura está a sufrir.

Creo que debemos seguir traballando precisamente para que a Cultura sexa o que debe ser, o selo de calidade e identidade dun territorio.

Chegado este fin de etapa quero agradecer, en primeiro lugar, a todos os traballadores e traballadoras da Agadic, polo seu bo facer, o seu esforzo e o seu trato que fixeron que me sentise como en familia.

En segundo lugar quero agradecer a todo o sector o seu apoio e comprensión nestes difíciles momentos. Obviamente coas tensións que deben existir, pero que tamén nos enriquecen. Pero agradezo, sobre todo, a gran capacidade de diálogo que se demostrou ao longo destes 3 anos e medio.

En último lugar, ao presidente Feijoo, ao conselleiro Roberto Varela e ao conselleiro Jesús Vázquez, por permitirme traballar neste importante proxecto chamado Galicia.

Moitas grazas.