Vacacións

Para a xeneralidade dos galegos, as vacacións escolares son desmesuradas e só benefician ós ensinantes, que se defenden argüíndo o estrés que a comunidade educativa está a vivir derivado do comportamento dos alumnos, o abrumador das materias e, en fin, a complexa preparación de clases e non sei cantos factores máis.

Tres meses no verán, máis Antroido, Semana Santa e Nadal, forman un conxunto de descansos que parecen sentarlles ben ós nenos, ós educadores, aínda que non tanto ós pais especialmente no caso en que os dous proxenitores traballan fóra da casa.

Os Plans de estudios foron introducindo as modificacións que as necesidades ían demandando, e as posiilidades que a situación permitía, habendo exemplos tan peregrinos como o de aquel calendario "Juliano", impulsado polo ministro Julio Rodríguez, que fóra Ministro por erro de Franco, que pretendía que o curso comezara o 1 de xaneiro e rematara o 31 de decembro, para facelo coincidir co exercicio presupostario e que as cifras casaran á perfección ó remate do ano.

Nos últimos tempos, en Galicia, a Consellería de Educación e Ordenación Universitaria foi aumentando o período escolar anual que se incrementou en dúas semanas, e segue o conselleiro na súa teima de que o descanso estival sexa só de dous meses -xullo e agosto- para evitar perda de hábitos por parte dos escolares e, cabe supor, por aproveitar tódalas
posibilidades que o aparato educativo ten.

E a min paréceme ben esta proposta pensando nos rapaces e na institución. Que xoga, é verdade, na contra do que parecen dereitos adquiridos dos profesionais do ensino de labor nunca fácil. Pero, a eses efectos, hai moitos outros sectores da sociedade que poderían facerse oir e considerarse agraviados polas diferencias de trato.

En fin, que as vacacións no ensino van mudar e reducirse, e a decisión ven de dentro, da administración educativa, sen presións do exterior, polo que cabe supor que só ventaxas para a educación -que é o único verdadeiramente importante- se van derivar deste cambio.

------------------------------------------------------------------


Gostaríanos coñece-las súas opinións: "xulio@galiciadixital.com"