Opinión en Galicia

Buscador


autor opinión

Editorial

Ver todos los editoriales »

Archivo

Noraboa, Xosé Manuel Carballo

viernes, 25 de noviembre de 2011
Falar ben dun amigo que vai facendo ben pola vida é ben doado. E moito máis cando o motivo é unha merecida homenaxe como a que a Irmandade Manuel María e a asociación Xermolos lle tributarán a Xosé Manuel Carballo este sábado, día 26 de novembro, ás doce da mañá, no Muiño do Rañego.

A familia de Manuel Rodríguez López queremos felicitar ó noso amigo polo seu importante labor cultural e social, ben plasmado polo amigo Xulio Xiz nun recente artigo en Galiciadixital.

Nós queremos lembrar a amistade que nos regala Xosé Manuel Carballo dende hai décadas rememorando o que o propio Manuel Rodríguez López escribe en crónica datada o 31-V-1979 e recollida no seu libro “Galegos en Catalunya 1978-1982”:
«Cantos enchemos o salón de actos do Centro Galego e o teatro de Hospitalet, moito antes das horas fixadas para ver «Os Valuros», non quedamos defraudados. A colonia galega da Cidade Condal endexamais tivemos a sorte de acudir a un acto que nos concienciara tanto como a peza teatral de Xulio Pita «Vaise a pechar outra casa máis», traxicomedia en tres actos, representada por labregos de Castro de Rei e Santa Leocadia da terra Cha, dirixidos polo crego D. Xosé Manuel Carballo.»

Máis adiante segue dicindo: «Obras como a representada polos «Valuros» poden facer rexurdir un pobo que esmorece. A concienciación da nosa xente é a única maneira de poder erguer Galicia e «Vaise a pechar outra casa máis» afonda na chaga que nos roe. Ogallá que as institucións e os representantes do pobo comprendan a mensaxe que esta peza encerra e, íntimamente xunguidos coas nosas xentes, acaden o remedio para que non se pechen máis casas.»

E remata: «Non sei se D. Xosé Manuel Carballo atendeu o consello de Antón Villar Ponte que escribiu: «Se queremos salvar da morte o "xenius" galego e que Galicia volva a atoparse a sí mesma escoitando a voz eterna da Terra, non é posible continuar cos brazos cruzados. É mester a creación e afirmación dun teatro galego». O que sí podo dicir é que o crego lugués tivo un gran acerto coa súa iniciativa e, se se mantén na mesma liña, non será de extrañar que recolla éxitos coma os de Barcelona e Hospitalet.»

O amigo Xosé Manuel continuou co seu exitoso labor teatral, un de tantos aspectos da súa importante actividade humana. Boa proba delo foi o éxito que recentemente conseguiu o seu grupo “Os xubilosos” en numerosos actos, incluido ó de entrega dos premios da “IX Edición do Certame Manuel Oreste Rodríguez López de Paradela” no ano 2004, 25 anos despois da representación de «Vaise a pechar outra casa máis», en Catalunya.

No libro do certame dos premios de Paradela, Xosé Manuel Carballo deixou escrito: “Non ha de fallar quen diga que cos gastos destas cousas podíase amañar un camiño. Independentemente de que iso poida ser certo, non convén perder de vista que a cultura por si soa non abre camiños, pero é imprescindible para que os camiños sexan máis anchos e, sobre todo, para que non sexan camiños sen saída e conduzan ás portas dos veciños, servindo así a ese admirable tecido de relacións humanas perdurables, que son do máis gratificante que nos pode deixar a vida e do máis útil que pode xestionar ou impulsar calquera administración”.

O amigo Carballo ten a sensibilidade de facer chegar nidiamente mensaxes que nos fan reflexionar acerca das casas que se pechan nas nosas vidas, e tamén nos regala o seu traballo e acertada visión para ampliar o camiño da nosa existencia.

Moitas gracias e noraboa.
Rodríguez López, Santiago
Rodríguez López, Santiago


Las opiniones expresadas en este documento son de exclusiva responsabilidad de los autores y no reflejan, necesariamente, los puntos de vista de la empresa editora


ACTUALIDAD  
PORTALES  
SERVICIOS  
ENLACES  

RSS Válido

PUBLICIDAD
ACTUALIDAD GALICIADIGITAL
Blog de GaliciaDigital
PUBLICIDAD
Deputación de Ourense
PROMOCIÓN
PUBLICACIONES
Publicaciones
Publicaciones Amencer
Revista Egap
Obradoiro de Artesania