Javier Irureta

Habitualmente, escribo para G.D. sobre un tema ou conxunto de temas que me chaman a atención, podendo os habituais do Portal comprobar que os temas deportivos son os menos, normalmente alleos ós meus intereses.

E, sen embargo, hoxe chámame a atención Javier Irureta, entrenador do Deportivo desde hai arredor de sete anos, e ó que lembro de tempos xa históricos nos que militaba como xogador coido que no Atlético de Bilbao.

Pero moitos futbolistas deveñen en entrenadores. E os entrenadores caducan.

Chamou poderosamente a miña atención esa caducidade cando Arsenio, apodado "o zorro de Arteixo", cando (en galego é "raposo" e non "zorro") que levou ó Deportivo ós cumes da gloria do futbol foi apartado do cargo de entrenador por considerar que había que "pasar páxina" e seguir subindo.

Eu son dunha época na que o Deportivo era, sí, un bo clube. Pero era un clube co que se "tuteaban" o Ferrol ou Lugo, o Celta ou o Pontevedra.

Desa situación sacouno Arsenio. E Irureta tivo ó seu cargo sete anos do xa primeiro clube de Galicia que se codeou cos mellores de Europa e no que Irureta era figura mediática, auténtico mago, que ata fixo por terra o Camiño das Estrelas para agradecer ós ceos a marcha do clube.

Pero todo muda. E parece que a estrela de Irureta perde brillo. Algún xogador ousa facer declaracións públicas sobre monotonía e falta de alicientes. Primeiros sinais de que a variña máxica deste mago está deixando de ter poderes.

Síntoo por Irureta. Síntoo polos que foron e comezan a non ser. Síntoo polos que prestaron especialísimos servicios e, cando deixan de ser imprescindibles, son desbotados coma se fosen lixo.

¡Ánimo, Javier Irureta!.