Baltar

Baltar é unha parroquia do concello lucense de Pastoriza. Baltar é o apelido un escultor ourensán - Arturo- autor dun magnífico e orixinal belén. Pero quen escoita falar de "Baltar" sabe que se refire ó único posible politicamente falando, o Presidente da Deputación Provincial de Ourense, cun poder bastante maior do que normalmente se asigna ó titular de
tal cargo.

As augas veñen lodas nos regos políticos que de Ourense chegan a Compostela porque parece que, perto xa das eleccións, os detentadores de poder esixen a súa cota de presencia para situarse de cara ó futuro. E parece ser que Baltar non é dos máis tranquilos neste momento de mudanza.

E un, que aínda ten ramalazos de inocencia a pesar dos anos e as mudanzas vistas, non entende moi ben estes posicionamentos que fan que o denominado PPdeG (PP a secas en Galicia) dependa de como respiren os señores provinciais que están clarisimamente sinalados en Lugo e Ourense e algo menos nas provincias de occidente se ben parece que Cuíña e Romay seguen estando activos e ben activos.

Baltar seica cea esta noite con Fraga para deixar claras pretensións e realidades. Para facer valer o peso de Ourense. Para ter poder fóra de Ourense. Porque, a fin de contas, todo se refire a eso: Conseguido todo o poder en Ourense, conseguir todo o que se poida fóra do propio territorio.

Despois de Baltar, os outros. O conto de nunca acabar.

Pero eu, inocente, coidaba que a política era outra cousa. Que os contrincantes eran os dos outros partidos. Que os compañeiros de viaxe eran aliados naturais por sempre.

Cada vez entendo menos de política.