Xeitos de Peregrino

Estamos en Ano Santo Compostelano, hogano simplificado ou comercializado como “Xacobeo”, e a Galicia –como sempre; como nunca- chegan milleiros de peregrinos na percura da maxia dun fisterra, do espíritu do Camiño, movidos por quen sabe que fe. Pola Fe.

Din os entendidos que son homes a maioría. Seis a catro sería a proporción home-muller. E priman os maiores de 45 anos sobre os menores desta idade.

E de cando en cando, un famoso. Neste caso, famosa por parte de pai: Jenna W. Bush, que está a facer un anaco do Camiño, a partir de Samos, cunha “discreta pero estreitísima rede de vixiancia”.

O Camiño faise en solitario e “en silencio”. Cando se fai con luz e taquígrafos xa non é Camiño, senón outra cousa.

Certamente houbo en todo tempo peregrinos famosos, e polo vello Camiño Francés pasaron papas e reis que seguro traían consigo tamén unha “discreta pero estreitísima rede de vixiancia”.

Os xeitos do peregrino implican austeridade, sacrificio, dilixencia, sufrimento. Pero hai excepcións que confirman a regla e, a fin de contas, veñen dar aínda máis sona a esta ruta máis que milenaria.

Saquemos do supérfluo a bondade –o beneficio- que se poida. E todos contentos.