Políticos e política

Hai uns días, en Foz converxeron as miradas de moitos medios informativos, especialmente os audiovisuais da capital de España, porque presuntamente nun hotel desta localidade lucense pasaba uns días o marido da televisiva Belén Estéban, á que unha enquisa lle asigna un moi importante papel no noso futuro no caso de que decida dedicarse á política.

É penoso o panorama dun país onde se estima que os políticos son un dos problemas a resolver cando deberan ser a solución, e unha televisiva famosa polos seus amores cun toureiro pode chegar (Sigma Dos dixit) a ter grupo político propio e ser chave na formación do futuro goberno nacional. Esta irracionalidade é o froito dunha enquisa seriamente planteada (na forma, que non no fondo) sobre unha mostra de 3.200 persoas máis entrevistas na rúa a outras 800.

E parece ser que varios políticos se interesaron xa por esta persoa, ata agora allea á política, polo seu potencial de cara a unhas posibles eleccións, nas que en lugar de xogarnos o futuro a base de votos parece que o imos xogar á ruleta rusa.

Se a política é a arte de facer posible o imposible, á política lle temos cedidos todos os dereitos sobre o noso futuro, e se a política anda como anda, non é extraño que a nivel popular se teña o criterio que se ten sobre os que se dedican á política.
A todo esto, seria conveniente que os políticos serios se pronunciasen en relación coa situación da política e co resto dos políticos, porque por uns cantos estase a xulgar a todos. E todos saímos perdendo.