A amizade do goberno

Eso de ter gobernos amigos de outros gobernos, que sabemos sempre é interesante, non debera ser pero funciona. E o goberno de Galicia non parece ser moi amigo nestes momentos do goberno de Madrid.

Cando os gobernos central e autonómico eran amigos, no ano 2006, suscribiuse un convenio por catro anos entre a Presidencia da Xunta e o Ministerio de Traballo, polo que Galicia ía percibir vintecatro millóns de euros anualmente. E ó rematar este convenio en 2009, o próximo ano non virán para Galicia eses vintecatro millóns tan desexados.

Se esa supresión se fixese con todas as autonomías que disfrutaban dunha situación similar pouco podería dicirse xa que a crise é a razón suprema que goberna todo, incluso o mundo do traballo, imprescindible para sair da crise. Pero outras autonomías como Castilla La Mancha, Extremadura e Canarias, que tiñan como Galicia plans específicos do Goberno central para promover o emprego van seguir disfrutando desta situación.

Velaquí que o do goberno amigo funciona, porque Castilla La Mancha e Extremadura son autonomías gobernadas polo mesmo partido que goberna en Madrid. E Canarias -proba de que a amizade pode tamén ser compartida con outras forzas- está gobernada por Coalición Canaria que algo ten que ver no apoio ó goberno socialista en Madrid.

O Parlamento Galego acordou por unanimidade -tamén co apoio do Partido Socialista de Galicia- instar ó goberno central a que ese Plan integral do Emprego se prorrogue catro ano máis, precisamente agora que é cando máis se necesita.

Agardemos resultados, e que a amizade brille entre os dous gobernos que se non amigos entre sí teñen en común millóns de persoas que merecen trato de amigos.