Jesús Castro Vidal, Republicano de Honra 2024

Este vai, novamente, polo meu amigo Jesús. Un loitador pola liberdade que cómpre ter preto, moi preto para aprender todo o que transmite e expresa. A piques de completar 97 voltas ao sol é todo un referente para esa Sada que (en plena democracia)loitou e loita por esa liberdade roubada polo transfuguismo.

Jesús é un humanista sinxelo que procurou mudar a mundo actuando localmente. Por iso, dende Riobao (Sada) procurou sempre abrirlle camiño á liberdade. Primeiro dende unha ditadura que trouxo aquela guerra incivil na que Jesús perdeu ao seu irmán. Nese contexto soubo sacar adiante unha familia a base de traballo. Foi aquí onde se fixo polifacético, quizais sexa significativo que un dos seus primeiros traballos fora o de ferreiro xa que, dende aquela, non deixou de forxar a propia vida e a liberdade da que hoxe gozamos.

Moitas veces, pretenden que lle debamos a liberdade a palacio. Quen tenta pensar libre élle moi difícil tragar con esta roda de muíño sen atragoarse. Realmente, non hai por onde collela, sobre todo, cando se sabe que quen a difunde son os palmeiros oficiais do reino.

Os que temos claro isto sabemos porque honramos a xente como Jesús. É moi simple: son coma nós, son nosos e forman parte da vida traballada e loitada que imos virando día a día. Por iso, que Jesús sexa hoxe Republicano de Honra devólvenos a todos un anaco de xustiza e dignidade que a historia xa non será quen de expropiarnos. O día 13 de abril celebraremos a festa da liberdade cun dos seus enxeñeiros máis grandes. Un dos que forman parte dos imprescindibles de Bertolt Brecht.

Parabéns meu querido amigo Jesús.