Aquela vaca chamada Pinta
miércoles, 17 de enero de 2024
Na testa tiña ela branca pinta,
vaca rubia do país nova e esvelta.
De rapaz que era a miña me dixeran
e asumín tal encargo de por vida.
Na grande casa todo case había,
no faiado fadas e cousa vella,
na corte as ruminantes pracenteiras,
trebellos pra xantarmos na cociña.
Vaquiña pinta, onde estás agora?
Tras nome recibires es ti salva
nos mundos infinitos, nas auroras?
Busca nesta terra un recanto verde,
pois sufrida fuches, calada e mansa.
Ben eu querería un día alí verte!
Cabada Castro, Manuel
Las opiniones expresadas en este documento son de exclusiva responsabilidad de los
autores y no reflejan, necesariamente, los puntos de vista de la empresa editora
