Na UCI tamén é Nadal

Veño de ver un fermoso vídeo no perfil de Youtube de Belén Caseiro. Leva por título: "Nadal 2022 UCI HULA. Mensaxe de paz". Son 5 minutos e 45 segundos de ilusión nos que o persoal deste hospital (vestido de elfo) decide repartir ilusión.

Como se sabe, a ilusión é emocional pero, cada vez máis a medicina ten claro que a complexidade do ser humano impide separar o físico do emocional. Dende a mesma comunicación do diagnóstico (a medicina de hoxe en día aposta por ser franca coa persoa) ata as posibilidades de recuperación o ánimo da persoa xoga un papel fundamental.

Se nos situamos nunha Unidade de Coidados Intensivos, hai que ter en conta que a persoa pode perder a noción do tempo, xa que está nun lugar invariable e carece de parámetros para diferenciar mañá, tarde e noite; co correspondente desfase no almanaque...
...sei de persoas que fixeron auténticos esforzos por manterse ao día nunha realidade fixa e implacable. Por iso sei que estes 5 minutos e 45 segundos de ilusión teñen un valor que fuxe de calquera medida e, de aceptar algunha, non podería ser outra que a aceleración dos latexos no corazón da infancia.

Estou seguro que isto colma almas pero eles piden que nada lles quite o desexo de velar pola saúde.

Eu pido, tamén, que a filosofía poderosa de ilusión que ten o equipo UCI HULA se espalle por todos os recunchos. Elas, eles, profesionais da sanidade, saben devolvernos futuros que semellaban tronzados.

Avante sanidade pública.