Opinión en Galicia

Nos libros de Gianni Rodari “a ciencia véndese e consúmese en botellas”. “A historia é un líquido encarnado como unha granada; a xeografía, un líquido color verde menta; a gramática é incolora e sabe a auga mineral”. Os nenos, con só beber cada mañá un vaso de historia ou de matemáticas, aprenden o necesario. Lonxe do planeta Bih imaxinado por Rodari, as escolas constitúen un gratificante camiño ao coñecemento e o proceso de aprendizaxe unha fermosa aventura que todos os nenos e nenas teñen o dereito a vivir.

Desde a Administración educativa poñemos todo o noso empeño por que así sexa, e neste curso 2008-2009 continuaremos apostando por unha educación de calidade, procurando as maiores cotas de excelencia e equidade.

O curso 2008-2009 vén marcado polas novidades derivadas da Lei Orgánica de Educación (LOE), como son a introdución de novas materias, como Educación para a cidadanía e Ciencias para o mundo contemporáneo, que sen dúbida facilitarán aos estudantes útiles ferramentas para comprender e interpretar o mundo que os rodea e converterse en cidadáns críticos.

Do mesmo xeito, os alumnos de 4º de primaria e 2º da ESO serán avaliados nas competencias instrumentais básicas ao rematar o curso, unha avaliación cun marcado carácter formativo, informativo e orientador que incidirá na mellora da calidade educativa.

Queremos que todos os alumnos e alumnas poidan acceder coas mesmas posibilidades ao mundo do coñecemento, e por iso, este ano académico continuamos co programa de gratuidade de libros de texto, do que se benefician todos os alumnos da educación obrigatoria e especial de centros sostidos con fondos públicos. Como consecuencia, este ano Galicia volve a ser a Comunidade na que máis barata resulta a volta ao colexio, segundo un informe da Federación de Usuarios e Consumidores Independentes (FUCI).

A formación integral do alumnado é outra das prioridades deste curso, coa potenciación do programa de apertura de centros fóra do horario escolar, que xa se desenvolveu o curso pasado en 14 municipios galegos, e que agora abrimos a todos os concellos que o desexen a través dunha convocatoria pública. Grazas a esta iniciativa, os estudantes poderán participar en programas de éxito escolar, hábitos saudables, actividades lúdico-deportivas…, que redundarán na calidade e variedade educativa.

Este programa compleméntase e intégrase co servizo de comedor escolar, que continuamos apoiando e reforzando, con novas axudas para as ANPAS, e tamén, por segundo ano consecutivo, ofrecendo este servizo desde o primeiro ao último día de clase.

As linguas tamén gozarán de gran protagonismo neste curso que comezamos, conscientes da relevancia cultural e económica do multilingüísmo na sociedade actual. Neste senso, resulta especialmente significativa a importante evolución das seccións bilingües. Desde a Administración educativa galega continuaremos ademais desenvolvendo o programa de anticipación da primeira lingua estranxeira desde os 3 anos, convocando bolsas para estudar idiomas no estranxeiro e reforzando a rede de Escolas Oficiais de Idiomas.

Tamén nos preocupa o éxito, que os nosos alumnos percorran o seu camiño ao coñecemento do mellor xeito e con todo o apoio que precisen. Por iso seguiremos desenvolvendo programas como o PROA ou o MORA, ao que engadimos o Programa de mellora do éxito escolar en centros, dirixido ao alumnado de 3º de primaria e 1º e 2º de ESO, no que se implicarán 87 centros de ensino galegos, e que comprende accións de innovación educativa para a mellora das materias instrumentais.

Continuamos ademais coa dotación de equipos informáticos nos centros educativos e coa integración das novas tecnoloxías no día a día das aulas, e apostamos por uns centros educativos adaptados ás necesidades actuais, polo que realizamos importantes esforzos na execución de obras de ampliación, reforma e mellora.

As fantásticas botellas da sabedoría de Rodari esquecen unha cousa. Que a aprendizaxe non pode consistir nun preparado instantáneo. Por sorte, os seres humanos aprendemos durante toda a vida, e máis que un obxectivo final, a procura de coñecemento e sabedoría é un camiño en continua transformación e evolución que gozamos desde o principio ao fin. Desde a Consellería de Educación e Ordenación Universitaria queremos que as primeiras etapas desa travesía, as máis importantes, se realicen nas máis idóneas condicións, e con ese obxectivo traballamos.

Neste camiño cara a excelencia educativa contamos ademais co apoio e a colaboración de toda a comunidade educativa, docentes, familias e alumnado, que traballan día a día para facelo realidade. A todos e todas, deséxovos un proveitoso curso 2008-2009.