Os lumes do verán

Como case non temos verán, tampouco temos lumes forestais. Vaia unha cousa pola outra.

O retraso nas calores estiváis trae consigo un retraso na posta en marcha dos operativos da Xunta de Galicia, e cabe supor que polo tanto consegue un aforro importante nos investimentos que cada ano hai que facer neste país para evitar, se é posible prever, que o lume se leve por diante esa riqueza forestal que segue a ser importantísima a pesar das agresións destes últimos anos.

Tómanse todas as precaucións debidas, restrínxense as queimas, prohíbense os quads no tempo de verán polas nosas aldeas, pero todo segue a depender da climatoloxía, ata agora adversa para uns e beneficiosa para os que teñen intereses nos montes e para os que teñen a misión de protexelos.

Este ano, este verán, os lumes son outros... Ardeu Fadesa-Martinsa, e os rescoldos aínda seguen a laparear entre os empregados galegos da empresa e nos lugares onde a empresa ten promocións sen rematar.

E agora Fenosa, empresa que algún tempo foi galega, e que ó seu promotor lle proporcionou o Condado de las Fuerzas Eléctricas del Noroeste, e que na actualidade ten accións que andan de man en man na percura lóxica do mellor postor, pero sen a menor querencia polo lugar onde se asenta a súa base física, os seus embalses, a súa riqueza. Fenosa sobe na bolsa porque hai garantía de éxito económico, e porque os novos propietarios farán agora e sempre un bo negocio.

E agora, o lume de Eta, que volveu aparecer no verán norteño.

Estes lumes son máis difíciles de atallar, e non se dan apagado nunca porque sempre quedará brasa baixo da cinza. Os dos montes son máis espectaculares, pero os seus efectos non son irreversibles.