Subdesenvolvemento fiscal

Procedemos de tempos nos que os concellos contaban con recursos económicos misérrimos, e todo o que excedese minimamente dos gastos cotiáns resultaba prohibitivo como non fose coa axuda doutras administrcións.

Mellorou a situación, pero non tanto, e os concellos galegos presentan ingresos moi febles en relación con outros similares doutras autonomías, e por riba esfórzanse menos en cobrar ós morosos.

Subir os impostos nun concello non é doado para ningunha administración municipal, polo impopular que resulta unha acción así. En tanto, os custos aumentan, os servizos son cada vez máis completos, e a administración local galega languidece en espera de mellores tempos económicos.

Porque, segundo un informe que ven de ver a luz, estamos subdesenvolvidos en canto ó funcionamento das facendas rurais, peor cando máis pequeno sexa o concello, e a mesma filosofía municipal imperante impide que se acometan as medidas precisas para remediar esta depauperada situación económica.

É unha asignatura pendiente, e os concellos agardan polas mans milagrosas do Estado ou da Xunta, cargadas de donativos para os temas máis diversos. Mentras sexa así, mentras se agarde por dádivas ou subvencións, pouco teremos que facer.

Os alcaldes deben calcular, programar, e regularizar os impostos municipais. Pode ser un problema ó comezo, pero os resultados previsibles compensarán este esforzo.