Negacionismo 2.0

A semana pasada asistimos con estupor a unha convocatoria de manifestacións disque pola liberdade e contra as restricións impostas polo covid.

Estes “defensores da liberdade” xuntáronse para facer todo o indebido, protestando contra un goberno disque liberticida. Isto parece unha toleada ou podería ser un sketch de humor pero a realidade supera de novo á ficción.

Agora estamos á espera da “semente” destes irresponsables.

Ás veces penso se foi bo o feito de non visibilizar excesivamente a morte. Teño claro que foi o ético porque a morte forma parte da intimidade persoal pero ante os argumentos do negacionismo pregúntome se faría falla unha visibilización da traxedia.

Chegados aquí, espero unha actuación contundente da xustiza contra o movemento negacionista da cabeza aos pés pero, tamén, o descrédito e a defenestración do seus líderes que no fondo están poñendo en perigo ao pobo.

Falta nos fai sentidiño, que tolos xa temos abondo e, se cadra, representados nas institucións mundiais.