Opinión en Galicia

Propomos a súa inclusión no Catálogo Galego de Especies Ameazadas dentro da categoría de “vulnerábel”.

6 de marzo de 2008

ADEGA ven de solicitar á Dirección Xeral de Conservación da Natureza da Consellería de Medio Ambiente a inclusión do carballo anano (Quercus lusitanica) no Catálogo Galego de Especies Ameazadas, dentro da categoría de “vulnerábel”. Esta solicitude vai acompañada dun informe no que se indican as localizacións nas que se atopou esta planta e outras características interesantes das escasas poboacións desta especie em Galiza.

O carballo anano (Quercus lusitanica) é un arbusto de até 3 metros de alto que é propio do sur de Portugal, Andalucía, Marrocos, aparecendo tamén no Monte Pindo no Concello de Carnota.

No sur da península e Marrocos esta especie non está ameazada, sen embargo en Galiza atopamos unha única poboación cunha área moi limitada e que dista 500 Km da poboación desta mesma especie máis próxima, no Sur de Portugal. É un exemplo de área de distribución disxunta que indica que nos territorios intermedios houbo algún día o Quercus lusitanica e que por algún motivo, esta planta desapareceu de Galiza e do norte de Portugal.

A poboación de carballo anano do Monte Pindo debe ser protexida xa que é unha especie moi escasa e cun reducido número de exemplares. A solicitude feita por ADEGA a Conservación da Natureza pretende que se inclúa como vulnerábel en base á súa reducida área de ocupación e máis á súa singularidade xeográfica.

A proposta deberá se examinada na primeira reunión do Observatorio Galego da Biodiversidade, organismo criado pero aínda sen constituir, que agardamos sexa convocada en breve pola Dirección Xeral de Conservación da Natureza.