Opinión en Galicia

Despois de termos vivido outro Nadal, escandalosamente consumista, seguimos a baleirar os nosos achicados petos coa enganosa ganga das rebaixas. ¡Mercar polo pracer de consumir! Como se todos foramos ricos e estiveramos sobrados. Cómpre deter esta tolemia colectiva.

Epidemia que chega a todas partes. Ademais do mundo dos negocios abarca tamén ao mundo da Política. E mesmo ao da Igrexa. O auto/engano, os intereses (creados ou por crear) e os egoístas devezos de poder atrofian e atrapan mentes e corazóns. ¡Os feitos están á vista!

Gobernantes, con rebaixas nas promesas en infraestruturas (aves, autovías, pontes); nas leis sociais (dependencia sen estrear, subida soldos, pensións, axudas); ampliada distancia España pobre/rica; Galicia costeira/interior (Na Terra, 2007, pecharon 400 explotacións gandeiras, fuxiron 10.000 mozos/as e máis de 300 millóns de euros de perda por abandono terras)

En canto á Igrexa, demasiadas rebaixas tamén coa falla de testemuño evanxélico (vida/obras) e perda “autoridade de servizo dos pastores”, co consentido esquecemento Concilio Vaticano II, coa volta á misa tridentina, ás concentracións nas rúas, ás alianzas no terreo político, ao perigoso achegamento ao mundo dos negocios e outros poderes que non casan co Evanxeo.

Os políticos (goberno/oposición) e os bispos están de eleccións. Nosoutros tamén. ¿¡Quen vai ser presidente de España e quen da Conferencia Episcopal perante catro anos!? Vale a pena reflexionar. É a hora de falar tamén nosoutros. Como cidadáns/ás. Como Igrexa, aínda non.

¡Esperamos non nos deixar engaiolar polas promesas que poidan arrastrar... ¡máis rebaixas!