Alfonso de Guitiriz

PARA ALFONSO BLANCO TORRADO
NA HOMENAXE QUE LLE RENDEN OS SEUS FREGUESES

Teu dogma é o amor. E nese creo.
Sen dúbida por Deus serás premiado.
O teu fermoso exemplo é admirado
polo crente, agnóstico ou ateo.

Fixeches realidade o do Evanxeo
de Cristo, no perdón sempre ancorado
e por tantos cristiáns non observado.
Ti sempre a perdoar disposto arreo.

Teño que supoñer que iso é unha "gracia",
ben túa ou ben que foiche concedida,
que te afasta de toda teocracia.

Conduta que ti tes moi asumida.
Sei que nunca será unha falacia.
Bendigo o alto exemplo da túa vida!

(Poema lido o 19-02-2019 en Guitiriz, no descubrimento da escultura na honra de Alfonso Blanco/Xermolos, Alfonso de Guitiriz)