30 de novembro de 2007.
Grupos ecoloxistas, sindicatos agrarios e administración chegan a un principio de acordo para desenvolver a ZEPA (Zona de Especial Protección de Aves) da Limia. Para ADEGA a ZEPA da Limia era irrenunciábel, polo que só compría desvencellar a cuestión da loita política e desactivar as reticencias dalgúns sectores que vían esta figura de protección intrínsecamente negativa para os seus intereses. ADEGA sempre mantivo que non só é posíbel senon que tamén é necesario conxugar a protección das aves co aproveitamento sustentábel sos recursos da chaira limiá.
Conquerir unha axeitada zonificación da ZEPA en base ás características particulares de cada área e ás necesidades concretas de conservación é un requisito imprescindíbel para garantir a viabilidade deste ou decalquera espazo protexido.
Unha declaración unilateral de ZEPA por parte da Consellería que non atendera a estas cuestións e deixara á marxe aos labregos/as da comarca, ficaría valeira de contido e non contribuiría á conquerir os obxectivos de conservación que persegue a Directiva de Aves. Por outra banda, unha oposición pechada á ZEPA atendendo a intereses políticos ou gremiais, que mesmo chegou a cuestionar a presenza de especies de interese europeo, era inadmisíbel e lesiva para o interese xeral de conservar algunha das xoias ornitolóxicas do noso patrimonio natural.
Ao cabo, impúxose a racionalidade e ningún dos colectivos presentes na mesa de traballo (SLG, UU.AA. e XX.AA.) cuestiona xa a declaración da ZEPA da Limia. Cómpre pois encher de contido a proposta atendendo á realidade ecolóxica e socioeconómica da área. En función destes criterios, establecerase unha zonificación do espazo en función dos valores naturais e o seu estado actual, delimitando diferentes espazos e graos de protección e fixando os usos permitidos en cada caso.
Finalmente, abreuse tamén o debate sobre o futuro da Rede Natura en Galiza, diante do horizonte do 1 de xaneiro de 2008 cando entrará en vigor a Lei (estatal) de Conservación da Biodiversidade. Esta norma, consolida a Rede Natura como unha categoría especial de protección e obrigará a introducir modificacións na normativa galega. Actualmente en Galiza, os LICs e ZEPAs declarados fan parte da Rede Galega de Espazos Protexidos como ZEPVN (Zonas de Especial Protección dos Valores Naturais) e teñen as máximas cautelas en canto á planificación e os usos do territorio que, por exemplo os Parques Naturais.
Trátase pois de poder conxugar a protección destas áreas cun uso sustentábel e acabar con agravios comparativos e proibicións absurdas que en moitos casos só beneficiaban ás grandes empresas, perxudicando aos seus habitantes (eis os parques eólicos, piscifatorías...)
ADEGA aposta porque a Rede Natura sexa o motor do desenvolvemento sustentábel de moitas destas áreas, para o que seguramente serán precisas algunhas adatacións lexistlativas. Pero isto non debe significar o levantamento da veda na Rede Natura que, non esquezamos, é a máis cativa en superficie relativa de todo o estado (agás Melilla).
ADEGA pula por ampliar a Rede Natura galega, mesmo a incorporar novas áreas á Rede Galega de Espazos Protexidos, dotándoos dos instrumentos de conservación axeitados (Plano Director e Planos de Conservación). Pero non imos permitir que nin un metro cadrado do que xa temos quede sin protección nin garantías efectivas de conservación.