Opinión en Galicia

Adega denuncia as afeccións á rede natura do parque eólico da Toxiza en Mondoñedo

A Mariña, 29 de novembro de 2007. O parque eólico da Toxiza no Concello de Mondoñedo está a afectar novamente ao maltratado LIC Serra do Xistral. As afecccións dos parques eólicos aos espazos protexidos prodúcense principalmente pola construcción de pistas de acceso, das cimentacións dos aeroxeneradores, as liñas eléctricas de evacuación e subestacións e outras infraestruturas de almacenaxe. Estas construccións destrúen a cuberta vexetal e, coma neste caso, drenan zonas húmidas brañentas ou turbosas destruindo totamente estes hábitats fogar de diversas especies de plantas protexidas.

Tamén son importantes as afeccións á fauna, nomeadamente ás aves. As colisións coas palas dos aeroxeradores son frecuentemente constatados por numerosos grupos ecoloxistas e científicos xa que, os impactos son abundantes sobretodo cando a néboa cubre os muíños, impedindo ás aves advertir que unha pala de grandes dimensións se acerca a toda velocidade. A dramática consecuencia é a morte de numerosas aves, mesmo especies protexidas e escasas, coas patas, ás ou cabeza seccionada por impacto cos rotores.

Xa que ADEGA non poido impedir as obras de construcción do parque eólico da Toxiza, en plena área protexida, queremos demostrar coas imaxes presentadas na web a grave deterioración que está a provocar, para que a cidadanía sexa consciente dos impactos ambientais que estas instalacións causan aos espazos protexidos.
Queremos tamen chamar a atención sobre as escasas políticas públicas de aforro e eficiencia enerxética, que farían innecesario o despilfarro de recursos e a producción de máis enerxía, aínda que sexa limpa.