Arredor do Nadal

Benvidos todos á edición XLVI de O Nadal en Begonte, que convirte ao noso concello chairego no punto centro do Nadal en Galicia, e no que agardamos de novo as pacíficas invasións que conflúen no barrio que os devanceiros bautizaron como Quitimil, dentro da capitalidade do concello, preto da igrexa parroquial e do colexio público.

Cada ano que pasa, afianzámonos no papel conseguido por este Centro Cultural de ser herdeiro dunha idea de fe con moi fondas raíces que medrou e enramou con forza en ponlas vizosas que nos falan de tradición, de sociedade, de cultura, de convivencia, de arte, de vida…

E ese afianzamento cristaliza en actividades, en irmandade, en atención especial a todos os que nos visitan, en fomentar a convivencia e potenciar o espíritu do Nadal, que se por natureza chama ás xentes de boa fe a celebrar a festa da vida, no noso caso convídanos ao esforzo por reforzar convivencias, vivencias do Nadal, experiencias vitais que nos van facendo medrar como crentes e como persoas.

No horizonte temos xa a cifra rotunda que acreditará que o Belén e as súas actividades complementarias cumprirá medio século. E aínda que pareza prematuro a estas alturas pensar en varios anos vista, contemplamos o futuro coa esperanza que da a firmeza da situación presente e a necesidade de planificar axeitadamente un tempo no que outras persoas, institucións e accións serán protagonistas, e ás que temos o deber de ir preparando e preparándonos para que esta idea –esta realidade- perviva despois de nós.

(Jesús Domínguez Guizán é Presidente do Centro cultural José Domínguez Guizán de Begonte, entidade promotora do Belén Electrónico begontino)