Paseíño semanal

Recuncho Hebdomadario: Paseíño Semanal
Non entendo cómo pode ser noticia que o concello de Ferrol retirará o busto do rei Juan Carlos I da fachada do edificio consistorial. Aínda está aí! Xa non é rei. Non ten porque lucir aí nin en ningún lado. É máis, non lle chegaba cun simple cadro, non; imaxino que será toda unha pedra da fachada… que non se quita así como así e que haberá que colocar outra, con gastos a cargo das arcas municipais, ou sexa, do paisano de a pé.

Seguen os atropelos á orde do día. Desgraciadamente. E non só na cidade das Burgas, senón incluso fóra da provincia. Os de fóra das cidades case sempre son por despiste do peón; porque cruza por onde non debe. E despois, a moitos, principalmente á xente maior, trabállalles máis a cabeza có corpo. Ven un coche ó lonxe e a cabeza dilles que lles dá tempo. Pero as pernas, ai as pernas! Certo, aínda así, se andásemos máis a modiño moitos atropelos evitaríanse, incluso eses nos que non hai culpa.

Segue a corrupción (cando se foi?) do Partido Popular. E por esta vez non estou alucinado por iso, senón polo parvos que somos: aínda é o partido máis votado! Falando claro; que nos gusta que nos dean polo detrás. Porque nos están dando. E ben. Todos os días asoma unha nova sobre as súas falcatruadas.

Acabou o soño copeiro do Celtiña. Penso que nin unha milagre o salvará. Pero aínda así, fóra deses fallos defensivos ocasionais, sigo gozando do seu fútbol. Que siga xogando así aínda que perda algúns partidos. Ale, remato o paseíño semanal.