Toque de atención na Universidade

Estábamos tan contentos coa nosa Universidade, e ven o Consello de Contas a poñernos as cousas claras, que simultaneamente resultan negras para o futuro.

A memoria que o Conselleiro Maior, Luciano Fariña, ven de presentar á Presidenta do Parlamento conclúe que un tercio dos universitarios non remata a carreira iniciada, porcentaxe que en algunhas carreiras chega ó corenta por cento.

Simultaneamente, o número de alumnos cada vez é menor, calculándose que dos 75.000 actuais baixarán a 66.000 o ano 2010. En tanto, aumenta o profesorado e polo tanto o gasto , polo que o Consello recomenda captar novos alumnos e suprimir titulacións para adaptar a formación á nosa realidade socio-económica.

Agora que conseguíramos ter un Campus en cada cidade galega, e formabamos ós alumnos universitarios en numerosas especialidades na propia casa, resulta que non todo é de cor de rosa, e compre facer reaxustes.

É problemático que o trinta por cento dos universitarios galegos non rematen os estudios, como é problemático que en determinadas carreiras técnicas só o sesenta por cento dos estudiantes rematan nos anos programados.Problemático é tamén o incremento dos custos por aumento do profesorado, e que o alumnado estea baixando paulatinamente sen previsión de melloría.

Qué é o que falla na Universidade?. Posiblemente haxa inflación en temas como en Enfermería, que se imparte en sete campus, Educación Infantil en seis, ou Filoloxía Hispánica en cinco. Porque a asignación de especialidades fíxose moitas veces en base a presións políticas e non á necesidade.

Posiblemente as salidas laborais dos universitarios non animan ós rapaces galegos a cursar unha carreira que non garante un emprego rendible.

O Consello de Contas propón unha serie de recomendacións para mellorar a situación que seguro non serán doadas de cumprir. Pero o toque de atención está dado, e alguén debe tomar boa nota de que non todo vai ben nos centros superiores de formación do País. Poñamos remedio antes de que sexa tarde.