¿A que xogan algúns Bancos?

En Galicia Dixital o pasado 22 de maio recibimos un e-mail de Caja Madrid como cliente de Banca en Linea indicando que o seu departamento de antrifraude ten desenvolvido un novo sistema de seguridade que “elimine calquera posibilidade de acceso de terceiras persoas ós nosos datos, contas nin fondos”, sendo para nós obrigatorio o uso deste sistema e aconsellándonos que introduzamos a nosa pregunta secreta e a súa resposta da conta canto antes.

Pero nós non somos clientes de Caja Madrid.

O mesmo 22 de maio, recibimos correo do Banco Español de Crédito sinalando que o servidor bancario tivo un fallo durante o mantemento do sistema e causou unha perda parcial de datos de varios clientes. Pídennos que “pinchemos no link de máis abaixo e recheemos os datos que nos pida o formulario”, tendo en conta que se non o facemos en 14 días a conta será suspendida temporalmente”.

E nós, non somos clientes de Banesto.

O 31 de maio, recibimos mensaxe de Open Bank indicando que diante de determinados problemas técnicos, algúns clientes non puideron usar a súa conta polo que “nos rogan confirmar os datos para o acceso on-line”. Nunca tivemos conta en Open Bank.
E en fin, o 1 de xuño, o Banco Santander Central Hispano dinos que despois dun “funcionamento inestable e frecuentes intermitencias” teñen renovado as súas instalacións bancarias e piden verificacións dos nosos datos.

Tampouco con este Banco temos relación comercial.

¿É posible que catro bancos estean a xogar co correo electrónico? ¿Son interferencias delictivas provocadas por alguén interesado en crear unha situación caótica?.

É extraña a coincidencia de catro mensaxes case iguais pedindo datos bancarios, e que ninguén advirta publicamente da súa existencia.

Alguén está a xogar co correo electrónico. Pero as catro entidades afectadas – Caja Madrid, Banesto, Open Bank e Banco Santander Central Hispano – deberían ter falado no caso de non ter nada que ver co tema.

Se nada teñen dito, ¿A que xogan?.