Chega o San Ramón

O ceo da Chaira vístese de luz e de color: comezan en Vilalba as festas de San Ramón e Santa María. As rúas e as prazas desta «Vila-Alba» están máis fermosas, locen as mellores galas para acoller a riada de chairegos e non chairegos que, en obrigada romaxe -case ó final do verán- compartirán cos vilalbeses e vilalbesas estes días de festa. As festas de San Ramón e de Santa María non son só as festas de Vilalba, son as festas de toda a Chaira. Por algo Manuel María escribiu:

«Na compaña de Saleta teño que ir ó San Ramón,
pasear toda Vilalba e troulear no folión...»
Coa ledicia por bandeira. (...)

¡Que fachenda ser chairego e andar pola capital
da Terra Chá ben amada, da nosa Chaira longal!
Coa ledicia por bandeira.

Gostaríame nestes días ser un mago que puidese dar cumprimento ós vosos desexos e encher a todos os vilalbeses e vilalbesas, ós chairegos e chairegas e a todos os que veñan ó San Ramón a Vilalba de ledicia festeira, de paz, de felicidade, de amor...

Nestes días temos que lembrar a aqueles vilalbeses e vilalbesas e chairegos e chairegas que, por diversas circunstancias ou por calquera motivo, non van estar na capital da Chaira nestes días de festa nos que se xuntan as familias e os amigos. Como dixo Manuel María, o bardo da Chaira:

¡Que ledicia, miña amiga, vir a esta festa maior
compartir coa nosa xente o pan, o viño, o amor...!
Coa ledicia por bandeira.

Que milagre, miña amada, as festas de San Ramón:
¡teñen palabras de alma e riman con corazón...!
E soio dunha maneira:
¡coa ledicia por bandeira!

¡Boas festas de San Ramón e de Santa María para todos e todas!