domingo, 12 de mayo de 2024
O secretario xeral de Política Lingüística, Valentín García, participou hoxe nos actos que o Concello de Mondoñedo e a Casa Museo Álvaro Cunqueiro, co apoio da Xunta de Galicia, organizaron para conmemorar o cuadraxésimo terceiro aniversario do pasamento do escritor mindoniense, autor de clásicos como Merlín e familia ou Escola de menciñeiros.
Como cada ano, a celebración, na que tamén participaron o alcalde de Mondoñedo, Manuel Ángel Otero, así como outras autoridades locais e provinciais, comezou cunha ofrenda floral no cemiterio vello ante a tumba de Cunqueiro. De aí, a comitiva trasladouse ao salón de plenos do concello, onde tivo lugar a entrega da oitava edición do Cunqueiriano de Honra ao poeta, narrador, dramaturgo, ensaísta e investigador Claudio Rodríguez Fer.
O poeta lucense foi elixido por unanimidade pola comisión designada para o efecto en recoñecemento ao seu labor na visibilización e proxección da figura do autor mindoniense, pero tamén pola súa contribución á literatura e poesía en lingua galegas contemporáneas, da cal é un dos seus maiores expoñentes e exportadores, destacou o representante da Consellería de Cultura, Educación, FP e Universidades.
Coa designación de Claudio Rodríguez Fer como Cunqueiriano de Honra de 2024 -que inclúe figura conmemorativa e diploma acreditativo-, o Concello de Mondoñedo e a Casa Museo Álvaro Cunqueiro consolidan a traxectoria destes nomeamentos, que en anos anteriores recoñeceron o labor de persoeiros como Darío Villanueva, Víctor F. Freixanes, Rexina Vega, César Antonio Molina ou Manuel Lourenzo, entre outros.
Sobre o galardoado
Claudio Rodríguez Fer (Lugo, 1956) é un dos máis destacados poetas da literatura galega do último medio século, ademais de narrador, dramaturgo e ensaísta e un dos máis recoñecidos galicianistas e hispanistas do noso tempo. Dirixe a Cátedra Valente de Poesía e Estética e codirixe a revista Moenia da Universidade de Santiago de Compostela, onde é profesor. Exerceu tamén a docencia en universidades de Nova York, París e Bretaña (pola que foi nomeado Doutor Honoris Causa) e coordina os cadernos Unión Libre.
Arredor de Cunqueiro e a súa obra, é autor de ensaios onde analiza en profundidade a figura do escritor d As crónicas do Sochantre, como Álvaro Cunqueiro en Ortigueira (2011) ou Borges e Cunqueiro (2021). Ao escritor mindoniense tenlle dedicado tamén amplos estudos nos seus libros Poesía galega (1989) e Acometida atlántica (1996). Así mesmo, dirixiu o Congreso Álvaro Cunqueiro e a Cultura Europea (1991) e conferenciou sobre o mindoniense en infinidade de congresos e xornadas por todo o mundo.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
