viernes, 10 de mayo de 2024
A Xunta de Galicia e Editorial Galaxia acaban de presentar dous novos títulos que engrosan a lista de obras publicadas pola editorial viguesa co apoio da Consellería de Cultura, Educación, FP e Universidades: a primeira adaptación a novela gráfica do clásico Memorias dun neno labrego, de Xosé Neiras Vilas realizada por Iria Aldegunde, e a Música dos Valladares. Retratos de familia, da autoría de Pablo Bernárdez.
Así informou en rolda de prensa o secretario xeral de Política Lingüística, Valentín García, que destacou a importancia de traer á actualidade e adaptar a todo tipo de público lector, especialmente á mocidade, obras como a de Neira Vilas, que ostenta o título do libro máis lido e traducido da literatura galega.
Dirixido a un público novo, esta innovadora versión de Memorias dun neno labrego traslada a Balbino, o rapaz de aldea máis famoso da literatura galega, ao mundo da banda deseñada a través das ilustracións da compostelá Iria Aldegunde.
O volume únese á longa lista de versións que desde a súa publicación, en 1961, suma o título co que o autor de Gres fundou a narrativa galega contemporánea.
Na presentación tamén participaron, ademais de Valentín García, a ilustradora; o presidente da Fundación Xosé Neira Vilas, Fernando Redondo, e o director de Produción de Galaxia, Xesús Domínguez, ademais da propia ilustradora.
A música da familia Valladares
Respecto ao libro A música dos Valladares. Retratos de familia, o representante da Consellería de Cultura, Educación, FP e Universidades salientou a necesidade de dar a coñecer a vida e obra dunha familia tan relevante para a nosa cultura como foi a dos Valladares, que nos deixou un importante legado en diferentes facetas do mundo artístico.
O volume, no que destacan as ilustracións de Hortensia Fernández, repasa a traxectoria vital e profesional dos irmáns Marcial, Avelina e Serxio a través da súa música. Cunha finalidade divulgativa, presenta textos alusivos á biografía dos compoñentes máis destacados desta numerosa familia ullá do século XIX.
Cada texto vai asociado a unha peza musical e unha ilustración. Ademais, as ditas pezas son accesibles mediante descarga a partir dun código QR, tanto en formato audio, arranxadas e gravadas para a ocasión, como en PDF para as letras e as partituras.
Acompañando a Valentín García tamén estiveron, ademais do autor e a ilustradora, os músicos Cibrán Seixo e Rubén Servide.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
