lunes, 20 de mayo de 2024
O presidente da Xunta, Alfonso Rueda, anunciou hoxe que o Consello acordou esta mañá, na súa xuntanza semanal, a declaración como proxecto público de urxencia e de excepcional interese, do novo Centro de Protonterapia de Galicia, que se situará en Santiago de Compostela.
Con este trámite, o Executivo galego culmina os procedementos urbanísticos previos necesarios para iniciar a construción dun centro sanitario que situará Galicia á vangarda dos tratamentos contra o cancro. Así, e tras entrega do proxecto por parte da empresa adxudicataria, a execución das obras comezará nas vindeiras semanas.
Deste xeito, tal e como explicou o presidente Galicia vai ser a primeira comunidade autónoma en iniciar as obras do centro sanitario en que se instalará un dos dez equipos de protonterapia que a Fundación Amancio Ortega ten financiado para o Sistema nacional de saúde. Así, a Xunta dotará ao Servizo Galego de Saúde dunha nova tecnoloxía máis segura, eficaz e precisa que a radioterapia convencional, na que se empregan fotóns ou electróns.
O presidente asegurou que o novo centro de Protonterapia suporá unha importante mellora na calidade asistencial que se achega á poboación galega xa que esta tecnoloxía de ultima xeración é máis segura e menos invasiva que a radioloxía convencional; permite tratar con menor radiación e de forma máis localizada aos tumores, permitirá acurtar dun xeito significativo tanto os tempos de terapia necesarios, así como os posibles os efectos secundarios que poden derivar doutras técnicas.
Outra das melloras que supón a terapia con protóns é que reduce significativamente os tratamentos innecesarios en tecidos sans, sendo unha forma eficaz para aqueles tumores nos que a radioterapia convencional non resulta efectiva, e nos que a cirurxía non é unha opción.
Por último, o feito de que a rede sanitaria pública galega conte con este novo centro, tamén suporá unha extraordinaria plataforma para a impulsar a investigación nos eidos da física e a bioloxía da radiación. Un fito ao que debe engadirse a posta en marcha do Centro de Produción de Terapias Avanzadas (CAR-T), sendo dúas unidades que incidirán na loita contra un dos maiores desafíos que enfrontan os sistemas de saúde, o cancro.
Centro de Protonterapia de Galicia
As obras do Centro de Protonterapia de Galicia situaranse na contorna do Complexo Hospitalario Universitario de Santiago de Compostela, e estará proxectada a construción duns edificios que ocuparán 3.683 metros cadrados, ademais de contar con 6.075 metros cadrados de espazos exteriores.
No seu interior, o centro de terapia de protóns dividirase en dous niveis. Unha planta baixa para a recepción de pacientes e as áreas de tratamento, persoal e mantemento; e un primeiro andar onde se situará a zona de dirección e os equipamentos do edificio. Así mesmo, o inmoble contará con dous búnkers, que poderán albergar dous equipos Proteus One, reservándose o espazo para instalar, de ser o caso, un terceiro.
Tal e como salientou Rueda, o futuro Centro de Protonterapia de Galicia atenderá os pacientes da comunidade galega, e tamén tamén recibirá os pacientes doutras comunidades, como Castela-León ou Asturias.
Aparcadoiro provisional no Hospital Clínico
En previsión ao inminente comezo das obras do Centro de Protonterapia de Galicia, e ás restricións que esta actuación urbanística xerará no aparcadoiro do Complexo Hospitalario Universitario de Santiago de Compostela, a empresa construtora está a acondicionar unha parcela próxima ao recinto sanitario, para habilitala como aparcadoiro provisional, e así compensar as prazas que se verán afectadas por estes traballos.
Neste sentido, cómpre destacar que o acondicionamento da parcela do novo aparcadoiro provisional do Hospital Clínico comezou esta mesma semana, non sendo posible iniciar estes traballos con anterioridade ao requirir dunha licenza que non foi aprobada pola Xunta de Goberno do Concello de Santiago ata o pasado luns, día 22 de xaneiro.
A Xunta de Galicia agradece a compresión cidadá ante esta nova actuación pois, tal e como recolle o acordo asinado esta mañá, o proxecto do novo Centro de Protonterapia de Galicia representa unha gran mellora social a nivel sanitario para o conxunto da poboación da nosa comunidade.
Os apoios, que poden chegar aos 3 millóns de euros por proxecto, son de ata o 45% do investimento subvencionable no caso dos proxectos de grandes empresas, mentres que no caso das pemes serán do 45% ou do 55% en función da porcentaxe de redución de emisións xustificada. Con estas axudas que xestiona o Instituto Enerxético de Galicia (Inega) búscase incentivar a transformación ecolóxica da actividade industrial de cara a unha economía baixa en carbono e a súa competitividade nun mercado global, diminuíndo o consumo de enerxía e promovendo a introdución da mellor tecnoloxía dispoñible. Ao mesmo tempo, estas axudas que se enmarcan na Estratexia Galega de Cambio Climático e Enerxía 2050 e na Axenda Enerxética de Galicia 2030 contribúen a reactivar e dinamizar a economía da provincia tras o peche das centrais térmicas.
A directora da Axencia Galega de Doazón de Sangue, Órganos e Tecidos, ADOS, Marisa López, salientou que o pasado ano se rexistraron en Galicia 103.525 doazóns de sangue, das que 9.564 se corresponden a persoas que doaron por primeira vez. Estes bos resultados, que foron expostos pola directora na Comisión 5ª de Sanidade do Parlamento de Galicia, sitúan Galicia entre as comunidades máis solidarias. Este número de doazóns permitiu dar resposta e garantir o abastecemento de hemoderivados de todos os centros hospitalarios de Galicia, en todo momento, e de xeito ininterrompido.
