domingo, 12 de mayo de 2024
A delegada territorial da Xunta en Vigo, Marta Fernández-Tapias, e o director xeral de Cultura, Anxo M. Lorenzo, anunciaron este xoves a creación do primeiro Premio Internacional de Poesía Carlos Orozapara conmemorar o centenario do nacemento do escritor que residiu na cidade durante gran parte da súa vida. Segundo avanzaron durante a presentación do certame literario xunto ao presidente da Asociación Évame Oroza, Xabier Romero, a iniciativa enmárcase nos actos arredor da figura do poeta que se completarán con exposicións e unha obra na que participarán 100 artistas e intelectuais.
É unha honra anunciar este acordo que ven a cumprir a petición por unanimidade do Parlamento Galego para divulgar a obra do poeta e que hoxe materializamos co anuncio para convocar un premio literario que converterá a Vigo en punto de referencia cultural en todo o territorio, sinalou a representante autonómica. Segundo avanzou a delegada, o vindeiro mes de marzo será convocado o primeiro Premio Internacional de Poesía Carlos Oroza en dúas modalidades (galego e castelán), cada unha delas cunha dotación económica de 6.000 euros, e un terceiro recoñecemento á mellor iniciativa musical de divulgación da poesía (premiado cunha obra de arte).
O galardón, segundo explicou Fernández-Tapias, convocarase cunha periodicidade bienal e será unha das moitas iniciativas para celebrar o centenario do autor. Desta forma, outro dos actos culturais será unha exposición itinerante que comezará en Vigo e percorrerá as principais cidades galegas. Ademais, o acordo entre a Xunta e a Asociación Évame-Oroza inclúe a edición do libro Oroza 100, na que participarán cen artistas, intelectuais e escritores aportando a súa visión do autor e as súas propias experiencias.
Pola súa banda, o director xeral de Cultura destacou a figura do escritor Carlos Oroza (Viveiro, 1923 Vigo, 2015) e a súa etapa na cidade olívica. Foi un dos grandes creadores que viviu na nosa cidade e con todo o seu nome e a súa obra aínda son unha grande descoñecida entre os galegos, polo que estamos ante unha oportunidade única para afondar na divulgación do traballo do poeta e creador, apuntou.
Ademais de Fernández-Tapias e Anxo Lorenzo, no acto de presentación participaron o presidente de Évame-Oroza, Xabier Romero, e outros membros destacados do colectivo cultural como os artistas Antón Pulido e Menchu Lamas, o músico Antón Reixa ou o xornalista Alberto Avendaño.
Recuperar o pulso cultural
A delegada territorial sinalou que Vigo ten un potencial cultural inmenso que por desgraza non recibe apoio de ningunha outra administración e isto queda probado coa resposta que estamos recibindo a nosas iniciativas. Tamén indicou que desde os primeiros contactos coa Asociación Évame-Oroza percibiron que existe unha grande expectación por recuperar o pulso cultural na cidade.
Seguiremos traballando nesta dirección porque creemos que Vigo o necesita, Vigo ten que recuperar a posición que tivo nas vangardas culturais. Estamos nunha cidade que marcou unha época no despertar musical do país, pero tamén nunha cidade que a día de hoxe é líder na produción editorial, en ningún outro lugar de Galicia edítanse máis libros que en Vigo, destacou.
Dinamización do Casco Vello
A presentación tamén serviu como estrea para a nova sede da Asociación Évame-Oroza nun edificio emblemático da praza do Abanico. O local foi adxudicado a través do concurso convocado polo Consorcio Casco Vello de Vigo que permitiu dinamizar a zona con novos negocios e emprendedores. Estamos no primeiro local que inauguramos tras a iniciativa que levamos a cabo desde o Consorcio para reactivar o barrio histórico vigués e a pesar dos atrancos aquí está a proba de que a medida foi un acerto e o resultado e un éxito, concluíu.
Foto: Fundación Laxeiro
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
