sábado, 11 de mayo de 2024
A Xunta pon en marcha o chamado Mapa de Valor da Enogastronomía de Galicia, un documento que, tras un extenso traballo de campo, permitiu identificar na nosa Comunidade máis de 2.000 recursos enogastronómicos. É unha das medidas que inclúe a estratexia Galicia Sabe para potenciar a nosa Comunidade como destino enogastronómico de primeiro nivel e que hoxe presentou o conselleiro de Cultura e Turismo, Román Rodríguez, xunto coa directora da Axencia Turismo de Galicia, nun acto celebrado no Castelo de Pambre, en Palas de Rei.
Segundo o responsable de Cultura e Turismo, este proxecto que será compartido co sector para o seu uso profesional permitirá detectar e priorizar destinos cun alto valor enogastronómico, poñer en marcha novos produtos turísticos a medio e longo prazo e coñecer mellor os recursos da Comunidade co fin de optimizar o traballo neste sector.
Precisamente, Román Rodríguez salientou que tanto esta como o resto de accións incluídas ao abeiro da estratexia Galicia Sabe suporán un verdadeiro impulso para a enogastronomía galega, que na actualidade constitúe a segunda razón pola que os visitantes chegan a Galicia.
Patrimonio cultural inmaterial
Entre as novidades que inclúe este proxecto destacan, por unha banda, accións para o recoñecemento e protección do sector enogastronómico da nosa terra. Entre esas iniciativas destaca o impulso á declaración da gastronomía como patrimonio cultural inmaterial galego, unha distinción que recoñecerá o peso e valor incalculable que ocupa a enogastronomía dentro da cultura e sociedade de Galicia.
Ademais de promover esta declaración, Galicia Sabe favorecerá a elaboración da chamada Memoria do Sabor, unha guía do enorme patrimonio culinario de Galicia que exercerá como recompilación de costumes, produtos, prácticas culturais ou receitas que definen a cociña de Galicia.
Aposta pola profesionalización e o I+D+i
O segundo dos eixos desta folla de ruta pasa por impulsar o coñecemento, a formación e o I+D+i vinculado á gastronomía con accións como a creación do Mapa de Valor da Enogastronomía de Galicia. Neste eido, a estratexia Galicia Sabe inclúe tamén entre as súas liñas de acción o proxecto de renovación do Centro Superior de Hostelería de Galicia para convertelo nun polo de innovación tecnolóxica coa creación do novo grao de Innovación Gastronómica e Xestión Hoteleira en colaboración coa USC e a creación dun viveiro de empresas nas instalacións do centro para dinamizar a actividade emprendedora neste sector.
Impulso aos produtos enogastronómicos
Ademais, esta folla de ruta para potenciar a enogastronomía galega permitirá impulsar itinerarios e rutas arredor de produtos agroalimentarios con identidade e tradición, amparados por Denominacións de Orixe, Identificacións Xeográficas Protexidas ou outras marcas de calidade. A primeira delas será a Ruta do Mel e do Queixo, un proxecto piloto ao redor destes produtos que nesta proposta inicial percorre 13 concellos da provincia de Lugo.
No marco desta liña de actuación, a Xunta promoverá ademais a renovación e mellora das festas enogastronómicas galegas. Neste eido, traballarase de xeito conxunto coa Federación Galega de Municipios e Provincias (Fegamp) na elaboración dunha ordenanza tipo que permita harmonizar os criterios organizativos e estéticos destas festas.
Un sector referente dentro e fóra de España
O responsable de Cultura e Turismo da Xunta destacou que esta batería de medidas incluídas ao abeiro da estratexia Galicia Sabe permitirá fortalecer o sector enogastronómico da Comunidade, que cualificou como un dos piares do modelo turístico galego pola súa capacidade por atraer poboación a toda Galicia e polo seu efecto desestacionalizador, permitindo atraer visitantes durante todo o ano.
Precisamente, lembrou que a Xunta leva realizado un intenso traballo no impulso e fortalecemento das potencialidades da enogastronomía galega. Entre esas accións citou o Plan de Dinamización das comarcas vitivinícolas que conta cun investimento de máis de 750.000 euros ou as axudas por 1,2 millóns de euros aprobadas a semana pasada para a mellora e modernización de aloxamentos turísticos e que este ano inclúen tamén os establecementos de restauración.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
