viernes, 26 de abril de 2024
O conselleiro de Cultura e Turismo, Román Rodríguez, acompañado polo delegado territorial da Xunta na Coruña, Ovidio Rodeiro, asistiu hoxe ao inicio da rodaxe do videoclip do Camiño de Santiago protagonizado por Julia Baird, irmá do músico John Lennon. Trátase dun filme musical apoiado pola Xunta a través do programa O teu Xacobeo e que ten como obxectivo promocionar o Camiño Inglés como parte das iniciativas do Consorcio de Turismo da Coruña beneficiarias desta convocatoria.
Co título Teu Camiñar, a canción composta pola artista galega Cristina Rubirosa comezou a gravación do seu vídeo musical na Torre de Hércules coa irmá do mítico compoñente de The Beatles como protagonista, o que contribuirá a súa difusión internacional. Neste sentido, o conselleiro lembrou que o mítico compoñente da banda inglesa proxectou facer o Camiño na década dos 70 acompañado por Salvador Dalí, pero lamentablemente nunca puido facelo realidade. Tras isto, foi a súa irmá quen, anos despois e co fin de renderlle homenaxe, decidiu recorrer o trazado inglés en compañía da Real Orde de Cabaleiros de María Pita.
Foi precisamente como froito da súa experiencia no Camiño Inglés como xurdiu a canción Teu Camiñar. Trátase dunha peza orixinal e inédita a cargo de Carolina Rubirosa, que contou para a súa gravación con músicos galegos de primeiro nivel e coa produción de Juan de Dios Martín. Os traballos de gravación iniciados hoxe alongaranse ata o venres e o equipo percorrerá, ademais da Coruña, as localidades de Ferrol, Bruma e Santiago de Compostela dando visibilidade a algúns dos lugares máis emblemáticos da Comunidade.
Iniciativas en marcha
O proxecto deste videoclip forma parte da iniciativa A Coruña, o porto do Camiño presentado polo Consorcio de Turismo e Congresos da Coruña á convocatoria O teu Xacobeo, o programa da Xunta dotado con 4,7 millóns como programación previa ao Ano Santo co obxectivo de que sexa unha celebración participativa, descentralizada e sustentable.
Nesta liña, o proxecto presentado pola entidade coruñesa, que conta cunha achega por parte da Administración autonómica de preto de 40.000 euros, contempla diferentes actividades cuxa finalidade é poñer en valor o Camiño Inglés. Así, ademais da gravación deste videoclip, tamén está previsto outras iniciativas como a reedición de folletos e publicacións sobre este trazado, a creación dunha páxina web específica, a organización dunha xornada formativa destinada aos profesionais vinculados co turismo ou a ampliación das visitas teatralizadas nas que se resucita á personaxe histórica do peregrino británico William Wey. Cómpre destacar tamén que no pasado mes de xuño levouse a cabo un espectáculo de video mapping sobre a Torre de Hércules no decimo aniversario da súa declaración como Patrimonio Mundial por parte da Unesco.
O quinto itinerario máis frecuentado
O Camiño Inglés, a ruta que ten na Coruña e Ferrol os seus puntos de inicio en Galicia, é o quinto trazado máis frecuentado polos peregrinos. Proba disto é que nos 8 primeiros meses do ano decidiron percorrer esta vía máis de 12.000 persoas, o que supón un incremento de preto do 15% en relación ao pasado ano.
Este importante crecemento que o Camiño Inglés está a experimentar no último lustro ven acompañado polo compromiso da Xunta de Galicia por poñer en valor este trazado que se materializa en melloras na sinalización do trazado, na creación de novos albergues como o aberto recentemente en Ordes ou o proxectado na Coruña, ou no plan de mantemento que comezará en breve e do que se beneficiarán 18 concellos de toda a provincia grazas a unha achega de preto de 900.000 euros.
A Cidade da Cultura reunirá estes días as persoas representantes dunha vintena de linguas minoritarias de Europa. Será durante a asemblea xeral e a conferencia anual da Network to Promote Linguistic Diversity (NPLD), unha organización de ámbito europeo cuxa finalidade é promover a diversidade lingüística na UE. Entre os seus membros figura, desde a súa creación, a Xunta de Galicia, que, a través da Consellería de Cultura actúa como anfitrioa nos eventos de 2024. Na xornada trataranse os asuntos que atinxen á administración da organización e presentaranse varios informes.
A Xunta vai solicitar de xeito inmediato ao Goberno central o traspaso dos medios materiais e persoais para xestionar a súa costa trala sentenza do Tribunal Constitucional que avala a Lei de ordenación e xestión integrada do litoral de Galicia. A conselleira de Medio Ambiente e Cambio Climático, Ángeles Vázquez, respondeu unha pregunta no pleno do Parlamento sobre esta materia na que salientou que o Alto Tribunal certifica que a norma galega é plenamente constitucional. Ademais, subliñou, confirma o que sempre defendeu a comunidade, que non é necesario reformar o Estatuto de Autonomía para que Galicia poida exercer plenamente as súas lexítimas competencias sobre o litoral.
