viernes, 26 de abril de 2024
A directora xeral de Xuventude, Participación e Voluntariado da Xunta de Galicia, Cecilia Vázquez Suárez, participou hoxe no albergue xuvenil de Gandarío nunha actividade de diálogo estruturado sobre liderado político e participación xuvenil no marco da terceira edición do programa Líderes de Futuro, unha iniciativa de educación non formal centrada no fomento do liderado e a innovación social posta en marcha por este departamento autonómico.
Cecilia Vázquez destacou a importancia de dar prioridade ao investimento en capital humano, o que implica reforzar a empregabilidade da mocidade, investir nas súas capacidades e axudarlles a aproveitalas". Neste sentido, explicou que o programa Líderes de Futuro ten como obxectivo reforzar o desenvolvemento das competencias clave da xente nova e facilitarlle ferramentas conceptuais e prácticas que lle permita desenvolver no futuro proxectos innovadores con impacto positivo na súa contorna. O investimento en coñecemento, habilidades e competencias resulta esencial para promover a innovación, a creatividade e a produtividade, afirmou.
O programa tivo un enfoque basicamente práctico centrado en fórmulas tradicionais de transmisión de coñecemento a través da análise de realidades concretas. Desenvolveuse en catro fins de semana entres os meses de abril e setembro, estruturándose en catro módulos: participación e empoderamento xuvenil; emprendemento e novos modelos de negocio; innovación e emprendemento social; e liderado: características e competencias. Nas catro xornadas participaron un total de cincuenta mozos e mozas con idades comprendidas entre os 18 e 30 anos.
Así mesmo, no transcurso da súa intervención a directora xeral incidiu na relevancia de ter en conta as suxestións da propia mocidade como elemento esencial no deseño e aplicación das políticas públicas. Ao respecto, sinalou que o método do diálogo estruturado é un instrumento fundamental de participación para a recollida de achegas, demandas e inquedanzas dos mozos e mozas, e que permite contar cunha política de xuventude más eficaz, coordinada e consensuada coas persoas a que esta vai dirixida.
Nesta liña, engadiu que a través deste diálogo o que se procura é definir recursos e medidas eficaces e modernas para favorecer a creación de oportunidades para todos eles e elas. Ademais, apuntou que esta aposta pola participación permite o seguimento e mellora continua das políticas de xuventude, ao tempo que se promove a implicación da xente nova no desenvolvemento político, económico, social e cultural da sociedade, así como tamén no proceso democrático.
O programa Líderes de Futuro enmárcase no apoio que está a prestar a Xunta de Galicia á difusión dos valores do emprendemento, a confianza e o estímulo na xuventude como capital de futuro.
A Cidade da Cultura reunirá estes días as persoas representantes dunha vintena de linguas minoritarias de Europa. Será durante a asemblea xeral e a conferencia anual da Network to Promote Linguistic Diversity (NPLD), unha organización de ámbito europeo cuxa finalidade é promover a diversidade lingüística na UE. Entre os seus membros figura, desde a súa creación, a Xunta de Galicia, que, a través da Consellería de Cultura actúa como anfitrioa nos eventos de 2024. Na xornada trataranse os asuntos que atinxen á administración da organización e presentaranse varios informes.
A Xunta vai solicitar de xeito inmediato ao Goberno central o traspaso dos medios materiais e persoais para xestionar a súa costa trala sentenza do Tribunal Constitucional que avala a Lei de ordenación e xestión integrada do litoral de Galicia. A conselleira de Medio Ambiente e Cambio Climático, Ángeles Vázquez, respondeu unha pregunta no pleno do Parlamento sobre esta materia na que salientou que o Alto Tribunal certifica que a norma galega é plenamente constitucional. Ademais, subliñou, confirma o que sempre defendeu a comunidade, que non é necesario reformar o Estatuto de Autonomía para que Galicia poida exercer plenamente as súas lexítimas competencias sobre o litoral.
