Nota de prensa del Gabinete de Comunicación del PPdeG:
O portavoz de Infraestruturas do Grupo Popular, Martín Fernández Prado, salientou no Parlamento que o compromiso do Goberno central co transporte ferroviario en Galicia refléxase en que dos 900 millóns de euros consignados por Fomento no proxecto de orzamentos do Estado para 2018 para a Comunidade galega, máis do 50 por cento son para o ferrocarril.
Deste xeito, Martín Fernández reiterou tanto a En Marea como PSOE que apoien a aprobación dos orzamentos xerais, xa que neles aparecen as partidas específicas para a mellora ferroviaria en Galicia e a mellora da seguridade no Eixo Atlántico de alta velocidade.
O compromiso co AVE do Goberno central vén sendo reiterado en obras e orzamentos, subliñou o portavoz popular, quen lembrou que o propio ministro de Fomento ven cada tres meses a Galicia a dar conta dos avances, porque o obxectivo é que as obras do AVE estean rematadas a finais de 2019. Neste momento, concretou que están executados o 80 por cento dos tramos e o resto atópase en obras.
Nota de prensa del Gabinete de Comunicación del BNG:
Ana Pontón afirmou que Feixóo ten a cabeza máis en Madrid, que en defender os intereses de Galiza e advertiulle que a súa obediencia e submisión a Mariano Rajoy non o sitúa na casilla de saída para a sucesión, entre outras cousas, dixo, porque non creo que a alternativa ao máster de Cifuentes sexan as fotos de Feixóo nun iate cun narcotraficante. Os galegos e galegas pagámoslle por defender os intereses deste país, non use a Galiza como moeda de cambio para os intereses da súa carreira política.
Hai un ano, explicou a nacionalista preguntáballe polo recortazo de Raxoi a Galiza nos orzamentos do Estado, nada menos que 440 millóns de euros. Calquera presidente reaccionaría dando a cara polo seu país pero a vostede faltoulle tempo para bendicir o recortazo e, a cambio, anunciaba unha comisión para controlar os investimentos. Unha comisión que nunca existiu, e iso que ía estar presidida por vostede mesmo. A súa palabra, recalcou Pontón, ten a mesma credibilidade que o máster de Cifuentes.
Non existiu comisión, e o peor, engadiu, é que non se executan os investimentos anunciados. Segundo os datos do Proxecto de Orzamentos, o Estado deixou sen investir 4 de cada dez euros prometidos, a maioría para as obras do AVE que, por exemplo, no tramo Olmedo-Lubián-Ourense deixou no caixón a metade do anunciado.
E como reacciona o Presidente da Xunta ante este novo recortazo nos investimentos dos PXE, preguntou Pontón, pois pedindo unha procesión. O pasado sábado en Sevilla, Feixóo pediu ao ministro de Fomento organizar no ano 2019 unha procesión do AVE a Galiza expresando o seu desexo de que o santo desa procesión fora o Presidente Raxoi baixando na estación do AVE en Ourense. Xa sei que parece un monólogo do Club da Comedia, pero non o é, era vostede falando do AVE galego en Sevilla, unha cidade, que por certo, xa celebrou o 25 aniversario da chegada da alta velocidade mentres aquí seguimos esperando e vendo como vostede se encomenda ao Santo Mariano Raxoi.
Sen embargo, as risas que provocou a súa intervención sevillana, indicou Pontón, non tapan a realidade: este ano Galiza recibe outra labazada nos orzamentos do Estado, e mesmo recoñecen que as obras do AVE non finalizarán ata o 2025.
Señor Feixóo, cambie de Santo ou teña un pouco de dignidade e exerza como presidente deste país, ironizou porque nas contas para 2018, o Estado presidido polo SANTO RAXOI vai gastar 3 veces máis en rescatar as autoestradas de Madrid que en investir en Galiza, soportamos os segundos investimentos máis baixos, en 15 anos, non hai proxectos novos e os vellos acumulan incumprimentos.
Ante a nova discriminación a Galiza nos investimentos dos Orzamentos Xerais do Estado, a portavoz do BNG propuxo unha reunión urxente, de todos os grupos parlamentarios, se pode ser mañá mesmo, dixo, para reclamar de maneira unánime: un investimento do 32% como o de Euskadi, consensuar unha proposta para que o AVE finalice no 2019, modernizar o ferrocarril, sanear as rías, financiar as zonas arrasadas polos lumes e subir as pensións. Ademais, Pontón tamén demandou que ningún deputado ou deputada do PP, elixido por Galiza apoie estas contas mentres supoñan un novo maltrato a Galiza.