Nota de prensa del Gabinete de Comunicación del PPdeG:
O portavoz do Grupo Popular, Pedro Puy, demandou tranquilidade ao BNG respecto da Comisión de investigación sobre as caixas galegas porque vaise constituír, vai chegar a conclusións e van ter a oportunidade de dicir o que pensan sobre este tema, cousa que xa o están a facer antes de que se redacten as conclusións.
Pedro Puy explicou que desde a aprobación a iniciativa do Grupo Popular polo Pleno da constitución desta Comisión de investigación o pasado 13 de decembro, o Parlamento galego ten traballado arreo con algo que é prioritario na súa tramitación: os orzamentos. En concreto, dixo que as Contas da Xunta para 2017 entraron no Parlamento a comezos de decembro e non pasou nin unha semana desde que tivemos o último debate para a súa aprobación.
Así mesmo, reiterou que na Comisión de investigación pódese incorporar todo aquilo que estea demostrado e que teña que ver coa evolución das caixas galegas. Respecto do control sobre as indemnizacións dos responsables das caixas, Pedro Puy incidiu que, en contra do que se dixo desde a oposición, era competencia do Banco de España e a Xunta non ten nada que ver con este tema. Para o portavoz popular, isto quedou demostrado no xuízo que condenou a algúns directivos das antigas caixas por non comunicar ao Banco de España a modificación das súas indemnizacións, polo que prestaron testemuña os anteriores responsables de ABANCA, inspectores e responsables do Banco de España, e todo aquel que tiña capacidade de aprobación ou control desas indemnizacións, pero ninguén da Xunta foi chamado como testemuña para opinar.
A cada quen lle pode parecer mellor ou peor que as entidades chegaran a acordos sobre retribucións dos seus directivos que fosen validadas polo propio Banco de España, pero quedou demostrado que cando se fixo á marxe do que marca a norma, que é que estean aprobadas polo Banco de España, a Xustiza actuou, explicou Puy.
O portavoz popular lamentou que no sector financeiro houbera un exceso de retribucións e indemnizacións aos máximos responsables, sobre todo atendendo á evolución no mercado dos servizos financeiros. Porén, apuntou que unha das cuestións que máis me alegrou neste proceso de transformación das caixas en entidades financeiras foi que o PP aprobase unha limitación ás retribucións dos directivos daquelas entidades que precisaban axudas públicas.
Foi unha decisión que se puido ter adoptado antes e se adoptou por parte do Goberno do PP en Madrid, o que conlevou que estas persoas que estaban xa á fronte de entidades intervidas visen como as súas retribucións se axustaran moito máis á realidade das entidades financeiras do que o estaban no pasado, recordou.
Nota de prensa del Gabinete de Comunicación del BNG:
O BNG denuncia que, sesenta días despois da súa constitución, a Comisión de investigación das caixas permanece paralizada tras unha única reunión de apenas cinco minutos, que proba o empeño do PP en agochar a súa responsabilidade na desaparición do sistema financeiro galego.
A portavoz nacional, Ana Pontón, culpou directamente a Feijóo deste veto, pide a reactivación inmediata da comisión e anunciou a presentación dunha queixa formal ante a Mesa, como máximo órgano de dirección da Cámara, e ante a presidencia da propia comisión de investigación.
Se o PP quere enterrar ese morto e porque sabe que algo cheira moi mal en todo o proceso, porque ten claro que é responsable da desaparición das caixas de aforro. Senón tivese nada que ocultar sería o primeiro interesado en investigar, alegou a deputada, que ve na paralización premeditada da comisión a pretensión de eludir a responsabilidade directa de Feijóo e un claro empeño en que nunca se saiba a verdade no maior desfalco en Galiza.
Pontón deixou claro que o BNG quere chegar ata o final e, por iso, pedirá novas comparecencias e novas solicitudes de documentación ao entender que hai moitos puntos sen investigar ademais da venda apresurada e de saldo de NovaGalicia Banco. Por exemplo, os termos da indemnización de 18M concedida ao ex director de Caixa Galicia, José Luís Méndez. Queremos coñecer a acta do consello de administración que deu luz verde a esta indemnización, subliñou a dirixente nacionalista.
Igualmente, fixo referencia ao opaco proceso de venda dos activos das caixas, citando o caso concreto de Geriatros. Así, lembrou a participación do 45% que a Xunta tiña en Sogarseso (Sociedade Galega de Servizos Sociais), -adicada á xestión de residencias da terceira idade promovidas pola administración pública-, que foi vendida á empresa Geriatros (100% CaixaNova) tras a chegada de Feijóo ao Goberno.
A portavoz nacional do BNG chama atención sobre o feito de que unha auditoría auspiciada polo ex banqueiro Angel Corcóstegui recomenda a venda dos activos das caixas fusionadas que, no caso concreto de Geriatros, é adquirida por 45M polo fondo de investimento Magnum Capital, propiedade do propio Corcóstegui, que vendeu tres anos despois por 300M.
O Bloque considera que debe investigarse tamén esta unha venda de saldo dun ben das caixas, -que ademais xestiona residencias da terceira idade en Galiza moitas construídas e postos en marcha con cartos públicos-, que xerou enormes plusvalías a un fondo de investimento no proceso de liquidación das caixas galegas.
Pontón tamén avanzou que vai pedir que se aporte nova documentación á comisión de investigación, como a carta remitida por Feijóo ao Banco de España sobre as indemnización ilegais dos ex directivos, das que é responsable directo, a auditoría de KPMG, ou a documentación do FROB sobre operacións de dubidosa legalidade realizadas polas antigas caixas.
Igualmente, o BNG pedirá novas comparecencias, empezando pola do presidente da Xunta, a da ex conselleira de Facenda, Marta Fernández Currás, a do ex gobernador do Banco de España, Miguel Ángel Fernández Ordoñez, e outras como a de Joaquín Almunia, comisario de Economía da UE durante o proceso, José María Castellanos, José Luís Méndez ou o ministro de Economía, Luís de Guindos, entre outros.
A portavoz nacional insistiu en que o Bloque non vai aceptar que o PP impoña unha comisión atada de pés e mans, e temos datos e argumentos novos para solicitar esas comparecencias, explicou. Por tanto, é úrxente que a comisión funcione e o faga sen vetos porque hai demasiadas zonas escuras e como país temos dereito a saber toda a verdade e todas as responsabilidades que apuntan directamente a Feijóo. Ninguén pode estar por riba do Parlamento, concluíu.